د قطر لومړي وزیر شیخ محمد بن عبدالرحمن آل ثاني وویل چې که تهران او واشنګټن یوې وروستۍ هوکړې ته ورسیږي، خلیجي هیوادونه کولی شي د دغه فنډ مالي ملاتړ وکړي.

د قطر لومړي وزیر او د بهرنیو چارو وزیر، شیخ محمد بن عبدالرحمن آل ثاني د ایران لپاره وړاندیز شوی ۳۰۰ ملیارده ډالري پانګونې فنډ یو "ارماني یا لوړ هدف لرونکی رقم" وباله.

له فایننشل ټایمز (Financial Times) سره په مرکه کې چې د چهارشنبې په ورځ خپره شوه، هغه اشاره وکړه چې که تهران له امریکا سره یوې نهايي هوکړې ته ورسیږي، خلیجي هیوادونه د دغه فنډ په مالي تمویل کې رول لوبولی شي.

شیخ محمد زیاته کړه: "هغه ۳۰۰ ملیارده ډالره چې د ایران د پانګونې د فنډ لپاره په پام کې نیول شوي، یو ارماني (لوړ هدف لرونکی) رقم دی."

د راپور له مخې، د ټرمپ ادارې وړاندیز کړی چې خلیجي هیوادونه کولی شي د دغه فنډ مالي ملاتړ وکړي، چې په لومړي سر کې به د شرکتونو لپاره په ایران کې د پانګونې د یوې وسیلې په توګه کار وکړي. خو هغه دا څرګنده نه کړه چې ایا قطر به په دې کې مالي ونډه واخلي که نه.

د اقتصادي ودې ملاتړ

هغه یادونه وکړه: "زموږ هدف دا دی چې ایران سوکاله شي او اقتصاد یې وده وکړي؛ زموږ پانګونه تل په بشپړ ډول په سوداګریزو پریکړو ولاړه ده."

دا وړاندیز شوی مالي میکانیزم د امریکا او ایران ترمنځ د "اسلام اباد تفاهم لیک" له شپږمې مادې سره تړاو لري، چې هدف یې په سیمه کې د دښمنۍ پای ته رسول دي.

د دې مادې له مخې، امریکا له خپلو سیمه ییزو شریکانو سره ژمنه کوي چې د ایران د بیارغونې او اقتصادي پراختیا لپاره لږترلږه د ۳۰۰ ملیارده ډالرو په ارزښت یو وروستی هوکړه شوی پروګرام رامنځته کړي.

په تفاهم لیک کې ویل شوي چې د دې پلان د پلي کولو میکانیزم به په ۶۰ ورځو کې د یوې وروستۍ هوکړې د برخې په توګه نهایی شي، پداسې حال کې چې امریکا به د اړوندو مالي معاملو لپاره ټولې لازمې اجازې، معافیتونه او جوازونه ورکوي.