د امریکا متحده ایالاتو لخوا د H-1B کاري ویزو فیس د کال ۱۰۰ زرو امریکايي ډالرو ته لوړل به د هند د ټکنالوژۍ خدماتو شرکتونو باندې  ډیر زیات منفي اغېز وکړي. دا خبرداری د جنوبي آسیا یوې مخکښې سوداګریزې ادارې ورکړی.

د امریکا ولسمشر ډونالډ ټرمپ د جمعې په ورځ یو فرمان لاسلیک کړ چې مخې به يي د سپټمبر د میاشتې د ۲۲ مې نیټې نه په اعتبار سره  له شرکتونو څخه د H-1B کاري ویزو لپاره په کال کې  ۱۰۰ زره امریکايي ډالر غوښتنه وشي.

ټرمپ د فرمان د لاسلیک پر مهال په سپینه ماڼۍ کې وویل: "موږ کارکوونکو ته اړتیا لرو. موږ غوره کارکوونکو ته اړتیا لرو. او دا پرېکړه به ډاډ ورکړي چې همدا به وشي."

د هند د ټکنالوژۍ صنعت اداره ناسکام د شنبې په ورځ وویل چې نوی فرمان به د هغو هندي وګړو پر ژوند هم اغېز وکړي چې د نړیوالو او هندي شرکتونو لپاره د H-1B ویزو لاندې کار کوي.

ناسكام زیاته کړه: "د هند د ټکنالوژۍ خدماتو شرکتونه به هم اغېزمن شي ځکه چې د ساحې دننه پروژو لپاره د سوداګرۍ تسلسل ګډوډېدلای شي، چې ممکن د تنظیم لپاره بدلونونو ته اړتیا وي. شرکتونه به له خپلو پیرودونکو سره نږدې کار وکړي ترڅو د دې بدلونونو سره ځان عیار کړي او د انتقال پروسه اداره کړي." دغه راز، دوی د نوي فرمان د "پلي کېدو مهال ویش" په اړه اندېښنه څرګنده کړه.

په ورته وخت کې، د هند د بهرنیو چارو وزارت وویل چې دا نوې پرېکړه "ممکن د کورنیو لپاره د ګډوډۍ له لارې بشري اغېزې ولري." وزارت زیاته کړه: "حکومت هیله لري چې دا ګډوډۍ د امریکا چارواکو لخوا په مناسبه توګه حل شي."

وزارت وویل: "د هند او امریکا صنعت دواړه په نوښت او خلاقیت کې برخه لري او تمه کېږي چې د غوره لارې موندلو لپاره مشورې وکړي."

یوازې نوي ویزې

د بله پلوه د سپینې ماڼۍ یو چارواکي د خالي په ورځ وویل چې د ټرمپ ادارې د H-1B ویزو لپاره سل زره امریکايي ډالره فیس ټاکل، چې اکثره د ټکنالوژۍ شرکتونه د بهرنیو کارکوونکو د ګمارلو لپاره کاروي، یوازې په نویو ویزو باندې به تطبیق شي او اوسني ویزه لرونکي یا د ویزې د نوي کولو غوښتونکي به ترې مستثنی وي.

چارواکي زیاته کړه: "دا یوازې یو ځل فیس دی."

د امریکا اداره وايي چې دا بدلون د ویزې په سیستم کې د پراخې ناوړه ګټې اخیستنې د مخنیوي لپاره دی.

د سپینې ماڼۍ د فرمان له مخې: "د امریکایي کارکوونکو د پراخې کچې ځای ناستې له امله د دې پروګرام سیستماتیکې ناوړه ګټې اخیستنې زموږ اقتصادي او ملي امنیت دواړه زیانمن کړي دي."

د پیو څیړنیز مرکز د معلوماتو له مخې، له ۲۰۱۰ کال راهیسې هر کال د H-1B کارکوونکو لپاره د تصویبونو لویه برخه هغو کسانو ته ورکړل شوې چې په هند کې زیږیدلي دي.

د هند د سوداګرۍ وزیر به امریکا ته سفر وکړي

د امریکا او هند ترمنځ د سوداګرۍ تړون لپاره خبرې روانې دي.

دواړو خواوو د دې اونۍ په پیل کې په نوي ډیلي کې د سوداګرۍ خبرې وکړې، په داسې حال کې چې د ټرمپ اداره د هندي توکو پر وارداتو ۵۰ سلنه تعرفې لګولې دي.

د هند د سوداګرۍ او صنعت وزیر پیوش ګویل به د دوشنبې په ورځ امریکا ته لاړ شي ترڅو له امریکایي چارواکو سره د سوداګرۍ خبرې وکړي، د سوداګرۍ وزارت په یوه بیان کې وویل.

په بیان کې راغلي: "هیئت پلان لري چې خبرې پر مخ یوسي ترڅو د دوه اړخیزو ګټو لرونکي سوداګریز تړون ته ژر تر ژره پای ته ورسیږي."

ویل کیږي د ټرمپ ددې فرمان نه به تر ډیره حده د هندوستان وګړي اغیزمن شي.