سینټکام د ایران پوځي څارنیز بنسټونه، مخابراتي سیستمونه او د هوایي دفاع سایټونه په نښه کړي دي.
د امریکا د پوځ مرکزي قومندانۍ (سینټکام) تایید کړه چې امریکایي ځواکونو د هرمز تنګي ته نږدې پر یوې سوداګریزې کښتۍ د تهران له وروستي برید وروسته، په ایران کې دننه پر څو هدفونو اضافي بریدونه کړي دي.
سینټکام د شنبې په ورځ وویل چې ځواکونو یې دا بریدونه د جون پر ۲۷مه "د اعلی سرقومندان په لارښوونه" ترسره کړي دي.
دې قومندانۍ ویلي چې دا بریدونه وروسته له هغه وشول چې ایراني ځواکونو د "M/T Kiku" په نوم یوه کښتۍ په یو طرفه بریدګر ډرون وویشتله. د پاناما بیرغ لرونکې دې کښتۍ د هرمز تنګي ته نږدې په داسې حال کې حرکت کاوه چې له ۲ ملیونو څخه ډیر بیرله خام تېل پکې بار وو.
سینټکام وویل: "سینټکام نن دا بریدونه د سوداګریزو کښتیو پر وړاندې د ایران د پرله پسې تیري په مستقیم ځواب کې ترسره کړل."
اعلامیه زیاتوي چې د امریکا پوځي الوتکو د ایران پوځي څارنیز بنسټونه، مخابراتي سیستمونه، د هوایي دفاع سایټونه، د ډرون د ذخیره کولو ځایونه او د ماین ایښودلو تجهیزات په نښه کړي دي.
دې قومندانۍ ویلي چې د هرمز له تنګي څخه د سوداګریزو کښتیو تګ راتګ دوام لري او امریکایي ځواکونه "بیدار، مرګوني او چمتو دي."
د ایران په سویل کې د چاودنو راپورونه
د ایران دولتي تلویزیون راپور ورکړی چې د یکشنبې په سهار د ایران په سویل کې د "سیریک" په ښار کې څو چاودنې اوریدل شوې دي.
دې رسنۍ د یوه نظامي سرچینې له قوله ویلي چې توغندي په "طاهرويي" کلي کې د مخابراتو پر یوې انتن لګیدلي دي.
د ایران "فارس" خبري اژانس په جلا توګه راپور ورکړی چې د ایران په سویل کې د "قشم" ټاپو په "میسین" کلي کې هم د چاودنې غږ اوریدل شوی.
د احتمالي مرګ ژوبلې په اړه تر اوسه کوم معلومات نشته.
د امریکا مرکزي قومندانۍ (سینټکام) د یکشنبې په ورځ په ایران کې پر څو هدفونو د اضافي بریدونو اعلان وکړ او ویې ویل چې امریکایي ځواکونو د ایران پوځي څارنیز بنسټونه، مخابراتي سیستمونه، د هوایي دفاع سایټونه او د ډرون اړوند تاسیسات وروسته له هغه په نښه کړل چې تهران یې د هرمز تنګي ته نږدې د سوداګریزو کښتیو پر وړاندې په پرله پسې اقداماتو تورن کړ.
