تهران وايي چې نوې ازادې شوې شتمنۍ د خوراکي توکو او درملو د واردولو ملاتړ کولی شي، خو ټینګار کوي چې له واشنګټن سره د شوې هوکړې له مخې، د امریکايي محصولاتو پر اخیستلو هیڅ ډول قانوني مجبوریت نشته.
د ایران د مرکزي بانک مشر، عبدالناصر همتي د هغو ادعاوو په وړاندې غبرګون وښود چې ګواکې تهران مجبور دی ازادې شوې پیسې د امریکا پر صادراتي توکو مصرف کړي. خو هغه اشاره وکړه چې که د امریکا کرنیز محصولات په مناسبه او سیالۍ وړ بیه وي، کیدای شي وپیرل شي.
همتي د سه شنبې په ورځ په یو ویډیويي پیغام کې د امریکا د ولسمشر ډونالډ ټرمپ هغه څرګندونې رد کړې چې ویلي یې وو، د وروستۍ هوکړې له مخې ازادې شوې پیسې باید یوازې له متحده ایالاتو څخه د خوراکي توکو او طبي وسایلو په رانیولو مصرف شي.
همتي وویل: "په هغو تفاهم لیکونو کې چې د مذاکراتو پر مهال لاسلیک شوي، داسې کوم شرط نشته. له متحده ایالاتو څخه د پیرلو هیڅ ډول مکلفیت شتون نه لري."
تهران په لګښتونو کې انعطاف ویني
همتي تایید کړه چې لومړنۍ ۱۲ میلیارده ډالره ازادې شوې پیسې د اړینو توکو او درملو د واردولو لپاره ځانګړې شوې دي، خو استدلال یې وکړ چې دا ترتیب به په حقیقت کې د ایران خپلې سرچینې نورو کارونو ته فارغې کړي.
هغه وویل چې تهران په نورمال ډول هر کال د ۱۰ څخه تر ۱۵ ملیارده ډالرو پورې پر اړینو وارداتو مصرفوي، او که چیرې د امریکا محصولات لکه جوار، غنم او سویا د نرخ او کیفیت شرایط پوره کړي، نو د هغو په اخیستلو کې کومه ستونزه نه ویني.
هغه زیاته کړه: "که دا ازادې شوې پیسې د هغو وارداتو لپاره وکارول شي، نو هغه سرچینې چې موږ به پخپله ورته ځانګړې کړې وای، پر ځای یې په بل ځای کې کارول کیدی شي او یا د زیرمو په توګه ساتل کیدی شي."
د تیلو صادرات او د بندیزونو کمول
د مرکزي بانک مشر همداراز د بندیزونو د لیرې کولو په اړه د تهران د لیدلوري په اړه وویل چې ایران تمه لري د ۶۰ ورځنیو خبرو اترو په جریان کې پرته له کوم محدودیت څخه تېل او پیټروکیمیکل محصولات صادر کړي او د کښتیو په تګ راتګ، بندرونو یا مالي معاملو کې له خنډونو سره مخ نشي.
دا څرګندونې د واشنګټن او تهران ترمنځ د هوکړې په اړه د دواړو لورو د عامه تفسیرونو توپیر ښیي، که څه هم دواړه لوري د تاوتریخوالي د کمولو او محدودو اقتصادي فعالیتونو د اسانتیا لپاره د ګامونو اخیستلو په حال کې دي.
