امریکا په مصر، لبنان او اردن کې د اخوان المسلمین څانګې 'ترهګرې' ونومولې
د ټرمپ ادارې د دې ډلې مصري او اردني څانګې له فلسطیني مقاومتي ډلې حماس څخه د ملاتړ پر بنسټ ترهګرې بللې دي.
امریکا متحده ایالاتو په مصر، او همدارنګه په لبنان او اردن کې د اخوان المسلمین ډله د "ترهګریزو سازمانونو" په توګه نومولې ده.
د امریکا د بهرنیو چارو وزیر مارکو روبیو د سې شنبې په ورځ په یوې بیانیه کې وویل: "دا نومونې په هر ځای کې د اخوان المسلمین د څانګو د تاوتریخوالي او بې ثباتۍ د شنډولو لپاره د یوې روانې او دوامداره هڅې د پیل اقدامات په ډاګه کوي."
"متحده ایالات به له خپلو ټولو شته وسایلو څخه کار واخلي، ترڅو د اخوان المسلمین دا څانګې په ترهګرۍ کې د ښکېلتیا یا یې د ملاتړ لپاره له سرچینو بې برخې کړي."
ولسمشر ډونالډ ټرمپ د دغه غورځنګ پر وړاندې د اقدام کولو پروسه پیل کړه، کوم چې په ۱۹۲۸ کال کې په مصر کې تاسیس شو او له هغه راهیسې ټولې عربي نړۍ ته خپور شوی دی.
سپینې ماڼۍ وویل، ټرمپ د نوامبر په میاشت کې یو اجرایي فرمان لاسلیک کړی و چې د بهرنیو چارو او مالیې وزارتونو ته یې لارښوونه کړې وه څو د اخوان المسلمین ځینې څانګې د بهرنیو ترهګریزو سازمانونو او ځانګړو نړیوالو ترهګرو په توګه د نومولو په اړه غور وکړي.
سپینې ماڼۍ وویل، د دغه اقدام موخه د دې څانګو د عملیاتي وړتیاوو محدودول، د هغوی د مالي سرچینو پرې کول او "هغو ګواښونو ته رسیدګي کول دي چې ښایي د امریکا اتباعو او ملي امنیت ته یې پېښ کړي."
د ټرمپ ادارې د اخوان المسلمین مصري او اردني څانګې د فلسطیني مقاومتي ډلې "حماس څخه د ملاتړ" پر بنسټ نومولې دي، حماس هم د امریکا له خوا د ترهګرې ډلې په توګه ډلبندي شوې ده.
