په کابل کې په یو چینايي رستورانت کې چاودنې ګڼشمیر کسانو ته مرګ ژوبله اړولې .

په کابل کې په یو چینايي رستورانت کې چاودنې ګڼشمیر کسانو ته مرګ ژوبله اړولې .

د راپورونو له مخې، د افغانستان په پلازمېنه کابل کې د دوشنبې په ورځ په یوه رستورانت کې چاودنې ګڼ شمېر کسانو ته مرګ ژوبله اړولې ده، چې په کې چینايي وګړي هم شامل دي.

د کابل د امنیه قومندانۍ ویاند، خالد ځدراڼ، ویلي چې چاودنه د ښار په سوداګریزه سیمه، شهرنو، کې په یوه چینايي رستورانت کې شوې ده. په دې سیمه کې لوی دفترونه، سوداګریز مرکزونه او سفارتونه هم موقعیت لري. عیني شاهدانو ویلي چې د برید هدف چینايي وګړي وو.

یوې ایټالوۍ نادولتي موسسې، ایمرجنسي، چې نږدې روغتون لري، ویلي چې دوی ته ۷ مړي او ۱۳ ټپیان ور وړل شوي دي. د دې موسسې مشر، دیجان پانیچ، په یوې اعلامیه کې ویلي: "په ټپیانو کې څلور ښځې او یو ماشوم هم شامل دي."

د چین دولتي رسنیو راپور ورکړی چې په دې چاودنه کې یو افغان ساتونکی وژل شوی او دوه چینايي وګړي ټپیان شوي دي.

د طالبانو د کورنیو چارو وزارت ویاند، عبدالمتین قانع، رویټرز اژانس ته ویلي چې د لومړنیو معلوماتو له مخې په پېښه کې ګڼ شمېر کسان وژل شوي او ټپیان شوي دي.

د ګلوبل ټایمز د راپور له مخې، وروسته له هغه چې د دوشنبې په ماسپښین په رستورانت کې چاودنه وشوه، ټپیان روغتون ته ولیږدول شول.

د شهرنو سیمه د کابل له خوندي سیمو څخه ګڼل کیږي.

د دې چاودنې مسؤلیت تر اوسه کومې ډلې په غاړه نه دی اخیستی. که څه هم طالبانو په ۲۰۲۱ کال کې د هیواد واک په لاس کې اخیستی او د امنیت د ټینګښت ژمنه یې کړې وه، خو بریدونه لا هم دوام لري، چې د ډیرو مسؤلیت یې د داعش ترهګرې ډلې پر غاړه اخیستی دی.