ملګرو ملتونو له ایران سره پر افغان پوله خپل کارونه په جزوي توګه بیا پیل کړل
د ملګرو ملتونو یوه جګپوړي چارواکي د چهارشنبې په ورځ وویل، دغې ادارې پر افغان ښځینه کارکوونکو د طالبانو د حکومت له لوري د محدودیتونو له امله د کار له ځنډولو وروسته، له ایران سره د افغانستان پر پوله خپل کارونه په جزوي توګه بیا پیل کړي دي.
د طالبانو چارواکو د اکتوبر په وروستیو کې د اسلام قلعه د کډوالو د هرکلي په مرکز کې، چې له ایران څخه د شړل شویو افغانانو لپاره د تګ راتګ اصلي لار ده، د "نږدې ټولو" افغان ښځو پر کار کولو بندیز ولګاوه.
ملګرو ملتونو ویلي، له هغو څه باندې ۱.۲ میلیونه افغانانو څخه چې سږ کال له ایران څخه د اسلام قلعه له لارې اوښتي، تر ۶۰ سلنې ډېر یې ښځې او ماشومان دي.
د ملګرو ملتونو د بشري چارو مشر، ټام فلېچر، د چهارشنبې په ورځ امنیت شورا ته وویل: «موږ د لږ شمېر ښځینه روغتیايي کارکوونکو لپاره د کار د بیا پیل زمینه برابره کړې او د ژوند ژغورنې محدود روغتیايي خدمتونه بېرته پیل شوي، خو نور عملیات په موقتي توګه ځنډول شوي دي.»
هغه له طالب چارواکو وغوښتل چې د دغې نړیوالې ادارې لپاره د افغان ښځو پر کار کولو لګول شوي محدودیتونه لرې کړي.
په ۲۰۲۲ کال کې، طالبانو په نادولتي موسسو کې د افغان ښځو پر کار کولو بندیز ولګاوه او دا اقدام یې په ۲۰۲۳ کال کې د ملګرو ملتونو پر ادارو هم وغځاوه.
د سپټمبر په میاشت کې، افغان چارواکو د ملګرو ملتونو دفترونو ته د ښځینه کارکوونکو د ننوتلو مخه ونیوله.
که څه هم ښځو ته لا هم په ځینو سکتورونو کې یا له لرې څخه د کار کولو اجازه وه، خو په دې وروستیو کې د ملګرو ملتونو له ټولو افغان کارکوونکو غوښتل شوي چې له کوره کار وکړي.
فلېچر وویل: «له کاري چاپېریال څخه د ښځو نشتوالی یو بل غموونکی یادښت دی چې افغان مېرمنې د نه منلو وړ محدودیتونو سره مخ دي.»
هغه همدارنګه په ټوله نړۍ کې په بشردوستانه مرستو کې د پراخ کمښت ناوړه اغېزو او پر افغانستان یې ژور اغېز ته هم اشاره وکړه.
فلېچر وویل: «د بودیجې کمښت د خدمتونو د بندېدو لامل شوی او د میلیونونو خلکو لپاره یې مرستې کمې کړې دي. دا کار په پای کې د خلکو د ژوند په بیه تمامېږي.»
سږنی ژمی به له کلونو وروسته لومړی ځل وي چې په افغانستان کې به د ۳۰۰ څخه د زیاتو تغذیوي مرستو مرکزونو په تړل کېدو سره، تقریباً هېڅ ډول نړیوالې خوراکي مرستې ونه وېشل شي.
هغه خبرداری ورکړ: «په داسې حال کې چې ۳.۷ میلیونه ماشومان د تغذیې مرستو ته اړتیا لري، او که درملنه یې ونه شي، ۱.۷ میلیونه یې د مرګ له خطر سره مخ دي، پایلې به یې ناورین رامنځته کوونکې وي.»
