هند د پنجشنبې په ورځ وویل چې د پاکستان هر ډول پوځي اقدام به د "ډېر، ډېر قوي ځواب" سره مخ شي.
د هند د بهرنیو چارو وزیر سبراهمنیم جایشنکر د خپل ایراني سیال سره د خبرو پر مهال وویل: "زموږ ځواب هدفمند او متناسب و. مونږ د وضعیت د لا خرابولو نیت او هوډ نلرو خو که پر موږ پوځي بریدونه وشي، پرته د شکه چې موږ به یې ډېر، ډېر قوي ځواب وکړو."
د جایشنکر دا څرګندونې په داسې حال کې کړي دي چې نوي ډیلي د پاکستان په بېلابېلو ښارونو د ډرون الوتکو سره تازه بریدونه کړي دي. د پاکستان پوځ ویلي چې لږ تر لږه ۲۵ ډرونونه یې ویشتلي دي، چې ویل کېږي دا ډرونونه د اسرائیل جوړ شوي هارپ ډوله دي.
د پاکستان لومړي وزیر شهباز شریف د هند د مرګوني توغندیزو بریدونو وروسته د غچ اخیستو ژمنه وکړه. دغه بریدونه د چهارشنبې په سهار ترسره شول. د بله پوه د کشمیر په کنټرول کرښه کې د څو ورځو راهیسې د دواړو خواوو ترمنځه د سپکو وسلو د بریدونو نه وروسته اوس د توپخانې بریدونه پيل شوي دي.
د چهارشنبې د تاوتریخوالي په پایله کې د دواړو خواوو څخه لږ تر لږه ۴۵ کسان وژل شوي دي، چې په کې ماشومان هم شامل دي.
جایشنکر د ایران د بهرنیو چارو وزیر عباس عراقچي سره وکتل، چې هغه نوي ډیلي ته د پاکستان له سفر څخه څو ورځې وروسته راغلی و. تهران هڅه کوي چې د اټومي وسلو لرونکو ګاونډیانو ترمنځ منځګړیتوب وکړي.
عراقچي هند ته د خپل راتګ پر مهال په یوه بیان کې وویل: "دا طبیعي ده چې موږ غواړو د هند او پاکستان ترمنځ کړکېچ کم کړو." هغه زیاته کړه: "موږ هیله لرو چې دواړه خواوې به زغم وښيي ترڅو د سیمې په وضعیت کې د لا زیاتې خرابۍ مخه ونیول شي. "
