پاریس له اروپایي ټولنې غوښتي چې د "ګلوبل صمود" په نوم د بېړیو په کاروان کې د اروپایي اتباعو په وړاندې د رامنځته شویو پېښو له امله پر بن ګویر بندیزونه ولګوي.
فرانسې د اسرائیلو د ملي امنیت وزیر ایتامار بن ګویر خپلې خاورې ته له ننوتلو منع کړی دی. د فرانسې د بهرنیو چارو وزیر ژان نوېل بارو دا کړنه د هغو "د نه منلو وړ اقداماتو" په غبرګون کې بللې چې د غزې په لور د روانې بېړۍ د فعالانو په وړاندې شوي دي.
بارو د شنبې په ورځ وویل چې دا پرېکړه په "ګلوبل صمود" کاروان کې د فرانسوي او اروپايي اتباعو په وړاندې د رامنځته شویو پېښو له امله شوې ده. هغه وویل: "فرانسه د خپل اتباعو ګواښل ، ډارول او د هغوې سره هر ډول بد چلند په هیڅ ډول نشي زغملی په ځانګړې توګه د حکومت د یو برحاله وزیر له خوا."
هغه پر خپله ایکس (X) پاڼه ولیکل: "دا کړنې د فلسطینیانو په وړاندې د هغه د ټکان ورکوونکو بیانونو، د کرکې خپرولو او تاوتریخوالي ته د هڅولو د یوې اوږدې لړۍ دوام دی." بارو زیاته کړه: "زه د خپل ایټالوي ساري په څېر له اروپایي ټولنې غواړم چې پر ایتامار بن ګویر بندیزونه ولګوي."
دا اقدام وروسته له هغه وشوه چې یوه ویډیو خپره شوه چې پکې بن ګویر (چې د بنیامین نتانیاهو د ائتلافي حکومت یو مهم شریک دی) د هغو نیول شویو فعالانو په منځ کې ګرځي چې لاسونه یې تر شا تړل شوي او پر ګونډو کینول شوي دي. په ویډیو کې بن ګویر د اسراییلو بیرغ رپوي او پر نیول شویو کسانو ملنډې وهي.
تر دې وړاندې د ایټالیا د بهرنیو چارو وزیر انتونیو تاجاني د اروپایي ټولنې د بهرنۍ پالیسۍ له مشرې کاجا کالاس څخه غوښتي و چې د بن ګویر په وړاندې احتمالي بندیزونه د اروپايي ټولنې د بهرنیو چارو د وزیرانو د راتلونکې غونډې په اجنډا کې شامل کړي. همداراز د آیرلنډ لومړي وزیر میشل مارټین هم د اروپايي شورا له رئیس څخه غوښتي چې په راتلونکې غونډه کې په بېړۍ کې د اروپايي اتباعو سره د اسراییلو د چلند په اړه رسمي بحث وکړي.
دغه کاروان چې د نړۍ له ۴۴ هیوادونو څخه ۴۲۸ کسان پکې سپاره دي، د پنجشنبې په ورځ د ترکیې له مارماریس ښار څخه د غزې د کلابندۍ ماتولو په نیت روان شوی و. د غزې کلابندي له ۲۰۰۷ کال راهیسې د اسراییلو لخوا لګول شوې ده.
