چین، روسیه، ایران او پاکستان په افغانستان کې د پوځي اډو له جوړولو سره مخالفت کوي. ټرمپ د بګرام اډې د  بېرته اخیستو غوښتنه کوي.

دغو څلورو هېوادونو په نیویارک کې د ملګرو ملتونو د عمومي اسمبلۍ په څنډه کې په یوه څلور اړخیزه غونډه کې د افغانستان پر حاکمیت او ځمکنۍ بشپړتیا ټینګار وکړ.

د چین د بهرنیو چارو وزارت د جمعې په ورځ وویل، چې چین، روسیې، ایران او پاکستان په جګړه ځپلي افغانستان کې د پوځي اډو د بیا جوړولو له هر ډول اقدام سره مخالفت کړی دی.

دا مخالفت وروسته له هغه وشو، چې د امریکا ولسمشر ډونالډ ټرمپ د طالبانو له لنډمهالي حکومت څخه وغوښتل چې د بګرام هوايي اډه پنټاګون ته بېرته وسپاري.

د چین د بهرنیو چارو وزارت ویاند ګو جیاکون په پیکن کې خبریالانو ته وویل، چې د پنجشنبې په ورځ په نیویارک کې د ملګرو ملتونو د عمومي اسمبلۍ د ۸۰مې غونډې په څنډه کې دغو څلورو هېوادونو د بهرنیو چارو وزیرانو او استازو د افغانستان په اړه یوه غیر رسمي غونډه وکړه.

ګو وویل، د څلور اړخیزې غونډې په ګډه اعلامیه کې "د افغانستان پر حاکمیت، خپلواکۍ او ځمکنۍ بشپړتیا پر درناوي ټینګار شوی دی."

ویاند وویل: "په اعلامیه کې د هغو هېوادونو له خوا چې په هېواد کې د اوسني وضعیت مسؤل دي، په افغانستان او سیمه کې د پوځي اډو له بیا جوړولو سره کلک مخالفت یو ځل بیا تکرار شو."

د هغه انځور له مخې چې د افغانستان لپاره د چین استازي 'یو' د امریکا په 'اېکس' ټولنیزې شبکې کې خپور کړی، په دې غونډه کې د روسیې د بهرنیو چارو وزیر سرګي لاوروف، د ایران د بهرنیو چارو وزیر عباس عراقچي، د افغانستان لپاره د چین استازي یو شیاویونګ او یوه لوړپوړي پاکستاني ډیپلومات عمر صدیق ګډون کړی و.

د وزارت ویاند ګو وویل: "دا په بشپړه توګه هغه درناوی په ډاګه کوي چې د افغانستان ګاونډي هېوادونه یې د دغه هېواد حاکمیت، خپلواکۍ او ملي وقار ته لري."

ټرمپ خبرداری ورکړی چې که د طالبانو حکومت د بګرام هوايي اډې کنټرول پنټاګون ته ونه سپاري، نو "بدې پېښې" به رامنځته شي.

طالبان د ۲۰۲۱ کال په اګست میاشت کې له افغانستان څخه د امریکا په مشرۍ د بهرنیو ځواکونو له بشپړ وتلو وروسته، له دوه لسیزې جګړې وروسته بېرته واک ته ورسېدل.

کابل د خپلې ځمکنۍ بشپړتیا پر سر له خبرو کولو ډډه کړې او پر ټرمپ یې غږ کړی چې د ۲۰۲۰ کال د دوحې هوکړې ته ژمن پاتې شي.