د اپوزیسیون مشر لاپید وايي چې لومړی وزیر نتنیاهو په سیاسي او ستراتیژیک ډول ناکام شو ځکه چې د اسرائیل حکومت د امریکا او ایران د لنډمهاله اوربند ملاتړ اعلان کړ.
د اسرائیلو د اپوزیسیون مشر یایر لاپید د چهارشنبې په ورځ د لومړي وزیر بنیامین نتانیاهو د امریکا او ایران د لنډمهاله اوربند ملاتړ په اړه په کلکه نیوکه وکړه او دا یې "سیاسي او ستراتیژیک ناکامي" وبلله.
لاپید په ایکس ټولنیزه شبکه کې وویل: “موږ هیڅکله په خپل تاریخ کې داسې سیاسي ناورین نه وه لیدلی. اسرائیل حتا د هغو پرېکړو پر مهال حاضر نه و چې زموږ د ملي امنیت د بنسټیزو موضوعاتو په اړه نیول کېدې.”
هغه زیاته کړه چې د نتنیاهو د “تکبر، بې پروايۍ او د ستراتیژیک پلان نشتوالي” له امله رامنځته شوی زیان ښايي کلونه وخت ونیسي ترڅو جبران شي.
لاپید ټینګار وکړ چې که څه هم پوځ او ولس خپله دنده ترسره کړې، خو حکومت د خپلو موخو په ترلاسه کولو کې پاتې راغلی.
هغه وویل: “پوځ هر هغه څه ترسره کړل چې ترې غوښتل شوي وو، او خلکو بې ساری زغم وښود، خو نتنیاهو په سیاسي او ستراتیژیک ډول ناکام شو او هېڅ یو له هغو موخو څخه یې ترلاسه نه کړل چې ځان ته یې ټاکلي وو.”
د هغه څرګندونې وروسته له هغه وشوې چې د نتنیاهو دفتر وویل چې اسرائیل د متحده ایالاتو د ولسمشر ډونالډ ټرمپ د پریکړې ملاتړ کوي چې د ایران په وړاندې د دوو اونیو لپاره پوځي بریدونه وځنډوي.
خو د نتنیاهو دفتر وویل چې دغه دوه اوونیز اوربند “لبنان نه رانغاړي.”
ټرمپ د سې شنبې په ورځ اعلان وکړ چې هغه موافقه وکړه چې "د دوو اونیو لپاره پر ایران بمباري او برید ودروي."
