بیجنګ د فیلیپین پرسونل تورنوي چې په قصدي ډول یې د ساحلي ساتونکو له یوې کښتۍ سره ټکر کړی او پر چارواکو یې برید کړی دی؛ خو مانیلا بیا ادعا کوي چې په دې نښته کې یو فیلیپینی سمندري سرتېری ټپي شوی، چې بیجنګ دا ادعا ردوي.
چین د سه شنبې په ورځ د سویلي چین په سمندر کې د لانجمن "رین آی جیاو" (Ren'ai Jiao) ریف ته نږدې له فیلیپیني پرسونل سره د شوې سمندري نښتې ویډیوګانې خپرې کړې. چین د فیلیپین ځواکونه تورن کړل چې په قصدي ډول یې د چین د ساحلي ساتونکو د ګزمې له یوې کښتۍ سره ټکر کړی او پر چینایي چارواکو یې برید کړی دی. دا پېښه د دواړو هېوادونو ترمنځ د وروستي تاوتریخوالي ښکارندويي کوي.
د "چاینا ډیلي" دولتي رسنۍ لخوا په خپره شوې ویډیو کې لیدل کېږي چې په دوو بادي کښتیو کې سپاره پرسونل د رین آی جیاو (چې د سیکنډ توماس شول یا ایونګین ریف په نوم هم یادېږي) ته څېرمه د چین د ګزمې یوې کښتۍ ته نږدې کېږي.
د نښتې په اړه متقابل تورونه:
چین او فیلیپین د دوشنبې په ورځ د سویلي چین سمندر په لانجمنو اوبو کې د کښتیو ترمنځ له ټکر وروسته پر یو بل تورونه پورې کړل. مانیلا ادعا وکړه چې د دوی یو سمندري سرتېری پر سر لګېدلی او ټپي شوی، خو پیکنګ وویل چې دا پېښه مانیلا پارولې وه.
دغه ویډیوګانې له پېښې یوه ورځ وروسته خپرې شوې دي.
د چین ساحلي ساتونکو ویلي چې د دوی پرسونل د لفظي خبرداریو، دفاعي مانورونو او د "خورا زغم" په ښودلو سره د چین د قوانینو سره سم "ځوابي اقدامات" کړي دي.
پیکنګ همداراز مانیلا د "حقایقو په اړولو" تورنه کړه او له فیلیپین څخه یې وغوښتل چې په هغو اوبو کې چې چین یې د خپل ملکیت ادعا کوي، له پاروونکو اقداماتو لاس واخلي.
