په قربانیانو کې شپږ نږدې ملګري او درې مسلکي لارښودان شامل دي او چارواکو د ټاهو جهيل کې د دې مرګونې واورې ښویېدنې په اړه څېړنې پیل کړې دي.
د چارواکو په وینا، د نهو سکي بازانو جسدونه، چې د دې اونۍ په لومړیو کې د ټاهو جهيل په کلیفورنیا برخه کې د واورې ښویېدنې له امله وژل شوي وو، د شنبې په ورځ را وایستل شول.
چارواکو وویل، دغه ډله د سې شنبې په ورځ د سکي وهلو په یو ورځني سفر وتلې وه چې واوره پرې را ښویېدلې ده.
په وژل شویو کې شپږ نږدې ملګري وو چې "د سکي وهلو تکړه او لېواله مینه وال" بلل شوي، او له دوی سره درې مسلکي لارښودان هم وو.
خپلوانو یې قربانیان د کري اټکین، لیز کلاباو، ډانیل کیټلي، کیټ مورس، کارولین سیکر او کیټ ویټ په نومونو پېژندلي دي.
د نوادا کاونټي (پولیسو) دفتر تایید کړه چې د "بلک برډ ماونټېن ګایډز" شرکت درې کارکوونکي، ۳۰ کلن مایکل هنري، ۳۴ کلن انډریو الیسانډراټوس، او ۴۲ کلنه نیکول چو هم په دې پېښه کې وژل شوي دي.
د NBC نیوز د راپور له مخې، د کلیفورنیا د نوادا کاونټي د پولیسو مشر، شنان مون وویل: "موږ منندوی یو چې توانېدلي یو هغوی خپلو کورونو ته راوړو."
د قربانیانو له ډلې پنځه تنه د جمعې په ورځ وموندل شول او د چورلکې په واسطه ولېږدول شول.
په دې واورې ښویېدنه کې پنځلس سکي بازان ښکېل وو. شپږ تنه ژوندي پاتې شول، چې په دوی کې دوه تنه برسېرن ټپیان شوي وو.
ګڼو ادارو د دې واورې ښویېدنې په اړه څېړنې پیل کړې دي.
د "سیرا د واورې ښویېدنې مرکز" به د پېښې راپور چمتو کړي او د کار په ځای کې د احتمالي خوندیتوب سرغړونو څېړنه کوي، او د پولیسو دفتر هم خپله پلټنه ترسره کوي.
یوازې په تېره یوه اونۍ کې د توپان له امله ۱.۷ متره واوره وریدلې او د باد سرعت په ساعت کې ۹۰ کیلومترو ته رسېدلی و.
د کولوراډو د واورې ښویېدنې د معلوماتو مرکز یادونه کړې چې روان موسم په امریکا کې لا دمخه د واورې ښویېدنې له امله د شپږو نورو کسانو د مړینې شاهد و.
