د جرمني لومړي وزیر فریدریش مرز او د امریکا ولسمشر ډونالډ ټرمپ د جمعې په ورځ په خپل لومړي ټیلیفوني تماس کې د اوکراین جګړې د پای ته رسولو لپاره د همکارۍ د پیاوړتیا پر اړتیا ټینګار وکړ.
د نوي ټاکل شوي حکومتي ویاند سټیفن کورنیلیوس په وینا، دواړو مشرانو د "اوکراین جګړې د پای ته رسولو په موخه د نږدې همکارۍ" پر اهمیت موافقه وکړه.
کورنیلیوس وویل چې مرز د ټرمپ هغه غوښتنه هم تایید کړه چې د روسیې او اوکراین جګړه باید ژر تر ژره پای ته ورسیږي.
کورنیلیوس زیاته کړه: "روسیه باید اوس د اوربند سره موافقه وکړي ترڅو د خبرو اترو لپاره ځای رامنځته شي،" او د کرملین څخه یې د فوري ګامونو غوښتنه وکړه.
کورنیلیوس وویل، ټرمپ ژمنه وکړه چې د جرمني هڅو ملاتړ به په کلکه وکړي، چې د فرانسې، بریتانیا، پولنډ او نورو اروپایي شریکانو ترڅنګ د سیمې دایمي سولې لپاره کار وکړي.
دواړو مشرانو موافقه وکړه چې منظمې اړیکې به دوام ولري او د امریکا او جرمني ترمنځ د متقابلو سفرونو پلان به جوړ کړي.
محافظه کاره مشر مرز، چې د سه شنبې په ورځ د جرمني د لسم چانسلر په توګه خپله دنده پیل کړه، د چهارشنبې په ورځ په پاریس کې د فرانسې ولسمشر ایمانوئل ماکرون سره په ګډه خبري غونډه کې د ټرمپ د اوربند نوښت بشپړ ملاتړ څرګند کړ.
نږدې همکاري
مرز وویل: "راځئ چې واضح ووایم: ولسمشر ټرمپ زموږ بشپړ ملاتړ لري ترڅو دې جګړې ته د پای ټکی کېږدي او په اوکراین کې وژنې ودروي."
هغه زیاته کړه موږ به د امریکا، اوکراین او خپلو اروپایي شریکانو سره په ګډه د یوې عادلانه، دوامداره او پایښت لرونکې سولې لپاره کار وکړو. کله چې د اوربند موافقه وشي، موږ چمتو یو چې د امریکا په مشرۍ او ګډون لاندې د هغې څارنې برخه شو.
مرز همدارنګه اعلان وکړ چې په راتلونکو اونیو کې به کیف ته سفر وکړي ترڅو د اوکراین لپاره د جرمني ملاتړ بیا تایید کړي.
کله چې د اوکراین لپاره د احتمالي امنیتي تضمینونو په اړه وپوښتل شو، چانسلر وویل چې لا هم د ځانګړو جزئیاتو د بحث لپاره وخت نه دی راغلی.
هغه خبریالانو ته وویل، تر هغه چې دایمي اوربند او د روسیې سره د سولې تړون شتون ونه لري، موږ نشو کولی د هغو امنیتي تضمینونو په اړه معلومات ورکړو چې موږ یې اوکراین ته وړاندې کولی شو، ځکه چې موږ لا هم د شرایطو په اړه معلومات نه لرو.
"زموږ له نظره، دا مهمه ده چې امریکا په دې بهیر کې ښکېله پاتې شي او همدارنګه د اوکراین لپاره د امنیتي تضمین په راتلونکي چوکاټ کې برخه واخلي. تر ټولو مهمه دا ده چې دا جګړه دایمي پای ته ورسیږي، نه دا چې لکه څنګه چې اوس مهال وړاندیز کیږي، یوازې د څو ورځو لپاره ودرول شي،" هغه د روسیې د ولسمشر ولادیمیر پوتین لخوا د می د ۸مې نیټې له سهار څخه د می تر ۱۱مې نیټې پورې د درې ورځني اوربند اعلان ته په اشارې سره وویل.
