اسرائیلي چارواکو د غزې له جګړې راهیسې له لوېدیځې غاړې څخه ختیځ بیت المقدس ته د فلسطینیانو پر تګ راتګ سخت محدودیتونه لګولي دي.
د چارشنبې په ورځ په فلسطین کې د روژې مبارکې میاشتې په لومړۍ ورځ اسرائیلي رسنیو خبر ورکړ چې دغه هېواد په اشغال شوې لوېدیځه غاړه او ختیځ بیت المقدس کې امنیتي خبرداری تر ټولو لوړې کچې ته رسولی دی.
د اسرائیل دولتي راډیو (KAN) وویل: «امنیتي بنسټونه له نن سهار څخه په څو برخو کې د خبرداري کچه لوړه کړې، چې ځانګړی تمرکز پر ختیځ بیت المقدس، د لوېدیځې غاړې سیمو او د سرحد پر کرښو دی.» دغه اقدام په حساسو سیمو کې له فلسطینیانو سره د احتمالي نښتو د مخنیوي او د سیمه ییزو تاوتریخوالو، په ځانګړې توګه د ایران په اړه د امنیتي ارزونو له امله شوی دی.
د اسرائیل د پولیسو او سرحدي پولیسو لویه برخه په ختیځ بیت المقدس، په ځانګړې توګه د "زوړ ښار" او د الاقصی جومات په شاوخوا کې ګمارل شوې ده. راپورونه وایي چې د روژې په لومړیو ورځو کې زرګونه امنیتي پرسونل په ساحه کې ځای پر ځای شوي دي.
اسرائیل اعلان کړی چې یوازې ۱۰،۰۰۰ فلسطیني لمونځ کوونکو ته به اجازه ورکړي چې د جمعې په لمانځه کې ګډون وکړي. دا په داسې حال کې ده چې د غزې د جګړې له پیل راهیسې، ختیځ بیت المقدس ته د فلسطینیانو پر تګ راتګ سخت بندیزونه لګول شوي دي.
د فلسطیني حقونو ډلو په وینا، اسرائیلي چارواکو د روژې له پیل وړاندې په بیت المقدس کې د نیولو کمپاینونه او د شړلو امرونه زیات کړي دي. په دې کې په ځانګړې توګه د اسلامي اوقافو ادارې کارمندان او پخواني بندیان په نښه شوي دي.
اسرائیلي ځواکونو د لوېدیځې غاړې او بیت المقدس ترمنځ نظامي پوستې ساتلې دي او یوازې هغو کسانو ته د تېرېدو اجازه ورکوي چې د اسرائیل پوځ ورته ځانګړي جوازونه ورکړي وي.
فلسطینیان ختیځ بیت المقدس د خپل راتلونکي دولت پلازمېنه بولي، خو اسراییل د ۱۹۶۷ کال له جګړې راهیسې دا سیمه اشغال کړې ده. د ۲۰۲۳ کال د اکتوبر له ۸مې راهیسې، اسراییلي پوځ او ناقانونه مېشتو یهودانو په لوېدیځه غاړه کې عملیات، د کورونو ورانول او د فلسطینیانو بې ځایه کول زیات کړي دي.
