په پاکستان کې پر یوه موټر د برید له امله یو تن وژل شوی او ۸ نور ټپیان دي
د پاکستان په خیبر پښتونخوا ایالت کې پر یوه موټر د لاسي بم په برید کې یو تن وژل شوی او ۸ نور ټپیان شوي دي.
د پاکستاني رسنیو د خبر له مخې، د خیبر پښتونخوا ایالت په لکي مروت سیمه کې د فابریکې د کارګرانو پر یوه موټر د لاسي بم برید شوی دی.
د پولیسو چارواکو په یوه خبرپاڼه کې ویلي، چې په دې برید کې یو تن وژل شوی او ۸ تنه نور ټپیان شوي، چې د دوو تنو روغتیايي حالت نازک دی.
چارواکو ویلي، چې دا برید د تحریک طالبان پاکستان له خوا شوی دی.
- د پاکستان د ترهګرۍ ستونزه
په پاکستان کې وسله وال بریدونه، په ځانګړې توګه د افغانستان پولې ته څېرمه په خیبر پښتونخوا او بلوچستان ایالتونو کې ډېر شوي دي.
په دواړو ایالتونو کې وسله والې ډلې چې د پښتنو او بلوڅو قومونو د حقونو د دفاع ادعا کوي، د پاکستان پر امنیتي ځواکونو او ملکي وګړو بریدونه کوي.
اسلام اباد ادعا کوي چې تحریک طالبان پاکستان په افغانستان کې ځای پر ځای دی او له هغه ځایه خپل بریدونه تنظیموي، خو افغان حکومت دا ادعاوې ردوي.
په بلوچستان کې بیا د بلوچستان د ازادۍ پوځ بریدونه ډېر دي. د بلوچستان د ازادۍ پوځ غواړي چې بلوچستان ایالت له پاکستانه جلا شي او بلوڅ خلک پر دې سیمه واکمن شي.
