د انقرې په کوربه توب د ناټو د دولتونو او حکومتونو د مشرانو ۳۶مه سرمشریزه د دفاعي صنایعو د فورم په پرانیستلو سره پیل شوه، چې په کې د ټرانس اتلانتیک دفاعي تولیدات او ورسره اړوندې پانګونې د بحثونو په محور کې دي.
د تورکیې په کوربه توب د ناټو د غړیو هېوادونو د دولتونو او حکومتونو د مشرانو د ۳۶مې سرمشریزې لپاره چمتووالی بشپړ شوی دی.

د دغې سرمشریزې په لړ کې به د ناټو د ۳۲ غړو هېوادونو د دولتونو او حکومتونو مشران، زرګونه ډیپلوماتان، خبریالان او نور مېلمانه ګډون وکړي. د پروګرامونو یوه برخه به د انقرې د سوداګرۍ خونې د کارنګرس مرکز کې ترسره شي.

د ناټو د غړو هېوادونو مشران به د جولای په ۸مه نېټه په ولسمشرۍ ماڼۍ کې سره وګوري.

د دفاعي صنایعو فورم په لومړي ځل په تورکیه کې په رسمي پروګرام کې شامل شو
نن به په ولسمشرۍ ماڼۍ کې د ناټو سازمان د دفاع او بهرنیو چارو وزیران غونډه وشي. د دفاعي صنایعو فورم چې په تېرو ۳-۴ کلونو کې د ناټو د یوې غاړې غونډې (side event) په توګه طرحه کېده، دا ځل په لومړي ځل په تورکیه کې د رسمي سرمشریزې په اجنډا کې شامل شوی ده.

د ناټو لخوا د خپاره شوي پروګرام له مخې، په دغه فورم کې به یوه مهمه اعلامیه خپره شي او ټاکل شوې چې د تورکیې مرستیال ولسمشر جودت ییلماز، د ملي دفاع وزیر یاشار ګولر او د ناټو عمومي منشي مارک روته وینا وکړي.

د دغه فورم په چوکاټ کې چې د دفاعي صنایعو په اړه به بېلابېلې ناستې ولري، مارک روته او د اوکراین ولسمشر ولادیمیر زیلینسکي به هم څرګندونې وکړي. مارک روته وړاندې ویلي و چې د دفاعي صنایعو د تولیداتو زیاتوالی به د دغه فورم یو له مهمو موضوعاتو څخه وي.

انقره د نړۍ د مشرانو کوربه توب کوي
ولسمشر رجب طیب اردوغان به د ۳۶مې ناټو سرمشریزې په ترڅ کې د امریکا له ولسمشر ډونالډ ټرمپ، د فرانسې له ولسمشر ایمانویل مکرون، د فنلنډ له ولسمشر الکساندر سټب، د سلواکیا له ولسمشر پیټر پیلګریني، د انګلستان له لومړي وزیر کییر سټارمر، د جرمني له لومړي وزیر فریدریش ميرز، د ایټالیا له لومړۍ وزیرې جورجیا میلوني، د کاناډا له لومړي وزیر مارک کارني، د البانیا له لومړي وزیر اډي راما، د بلغاریا له لومړي وزیر رومن رادوف، د مونټینګرو له لومړي وزیر میلوجکو سپاجیک، د ناټو له عمومي منشي مارک روته او د اروپايي شورا له رئیس انتونیو کوسټا سره وګوري.

د سرمشریزې په لړ کې به د بهرنیو چارو او دفاع وزیران به په کاري میلمستیا کې ګډون وکړي. د "استانبول د همکارۍ نوښت" په چوکاټ کې، چې په ۲۰۰۴ کال کې پیل شوی او قطر، بحرین، کویټ او متحده عربي امارات په کې شامل دي، د بهرنیو چارو د وزیرانو په کچه یوه ځانګړې غونډه وشي.

په دغه سرمشریزه کې یو تر ټولو مهمه هیله دا ده چې متحدین د ټرانس اتلانتیک په اړیکو کې د وروستیو کړکېچونو سره سره، د یووالي او پیوستون پیغام ورکړي.

د اجنډا په اصلي ټکو کې د "ناټو ۳.۰" (NATO 3.0) لیدلوری شامل دی، چې له مخې یې اروپا باید په متعارفه دفاع کې مشري په غاړه واخلي او په اروپا کې د امریکا پر پوځي حضور بیا کتنه وشي. همدارنګه له اوکراین سره د مرستو پر دوام او د دفاعي تولیداتو پر زیاتوالي به هم خبرې وشي. د انقرې دا سرمشریزه به د نړۍ د رسنیو په کچه یو له تر ټولو ډېره پوښښ لرونکې ناټو سرمشریزه وي.