امریکا د یوې ترهګرې ډلې پر خلاف د مبارزې په خاطر بلې ترهګرې ډلې نه ملاتړ کوي او پیسې ورکوي.
د پینټاګون په ۲۰۲۶ بودیجه کې د داعش پر وړاندې د مبارزې په پلمه د نورو ترهګرو ډلو نه د ملاتړ په موخه د روزنې او تجهیزاتو صندوق لاندې ۱۳۰ میلیونه ډالر ځانګړي کړي دي ترڅو په سوریه کې وسله والو ډلو، په ځانګړې توګه د YPG په مشرۍ د سوریې ډیموکراتیکو ځواکونو ملاتړ وکړي.
د دفاع وزارت د ۲۰۲۶ بودیجې د توجیه په اړه په یوه سند کې راغلي چې دغه صندوق د امریکا ملاتړ لرونکو د سوریې ډیموکراتیکو ځواکونو او د سوریې آزاد پوځ د روزنې، تجهیزاتو او میاشتني معاشونو لپاره ځانګړی شوی دی. دغه ځواکونه د سوریې جنوب ختیځ کې مېشت دي، او همدارنګه په عراق او لبنان کې د "تایید شویو شریکو ځواکونو" ملاتړ هم کوي.
په سند کې ویل شوي چې دغه بودیجه کې سپکې وسلې، طبي توکي او د تاسیساتو ترمیم شامل دي. د دې په وینا، د داعش بیا راپورته کېدل د امریکا ملي ګټو، د عراق، سوریې، لبنان خلکو او نړیوالې ټولنې لپاره ګواښ دی.
YPG د PKK د سوریې څانګه ده، چې د تورکیې، امریکا او اروپایي اتحادیې لخوا د ترهګرې ډلې په توګه پېژندل شوې ده.
د PKK/YPG ترهګرې ډلې ته تر ټولو زیاته برخه ځانګړې شوې ده
د پینټاګون په ۲۰۲۶ بودیجه کې سوریې لپاره ځانګړې شوې ۱۳۰ میلیونه ډالرو څخه، ۷.۴۲ میلیونه ډالر د سوریې آزاد پوځ ته ځانګړي شوي دي. په سند کې ویل شوي چې دغه پوځ به د بادیه دښته کې د داعش پاتې شونو پر وړاندې خپل فعالیت پراخ کړي.
خو د بودیجې لویه برخه د د سوریې ډیموکراتیکو ځواکونو لپاره ځانګړې شوې ده.
دغه وروستۍ بودیجه د ۲۰۲۵ کال لپاره ځانګړو شویو ۱۴۷.۹ میلیونه ډالرو او د ۲۰۲۴ کال لپاره ځانګړو شویو ۱۵۶ میلیونه ډالرو سربېره ده، چې واشنګټن د سوریې په ورته ډلو د داعش پر وړاندې د جګړې تر نامه لاندې ځانګړې کړې وه.
تورکیه دغه دلیل د دې لپاره رد کړی چې دا یوازې د دې لپاره یوه پلمه ده چې د دې هېواد په پوله کې ترهګرو ډلو ته وسلې ورکړل شي.
په تېرو څلورو لسیزو کې د PKK ترهګرې ډلې د خپلو بریدونو په ترڅ کې له ۴۰,۰۰۰ څخه زیات کسان وژلي دي، چې پکې ملکي وګړي، ښځې او ماشومان شامل دي.
تورکیه استدلال کوي چې د PKK/YPG تجهیز کول د هر ډول نوم لاندې د ترهګرۍ مستقیم ملاتړ ګڼل کېږي.
