د ایران په اړه د ټرمپ او نتنیاهو په لیدنه کې «کره پایله نه ده ترلاسه شوې»
ټرمپ په سپینه ماڼۍ کې له نتنیاهو سره له کتنې وروسته په «ټروت سوشل» (Truth Social) کې لیکلي: «له دې پرته چې ما ټینګار وکړ چې له ایران سره خبرې باید دوام ومومي ترڅو معلومه شي چې ایا یوه هوکړه کېدلی شي که نه، بله کومه کره پایله نه ده ترلاسه شوې.»
نتنیاهو، چې له ایران سره په خبرو کې د امریکا د سخت دریځ غوښتونکی دی، سپینې ماڼۍ ته له یوې غاړې دروازې ننووت او دودیز تشریفاتي هرکلی ورته ونه شو.
ټرمپ په سپینه ماڼۍ کې له نتنیاهو سره له کتنې وروسته په «ټروت سوشل» (Truth Social) کې لیکلي: «له دې پرته چې ما ټینګار وکړ چې له ایران سره خبرې باید دوام ومومي ترڅو معلومه شي چې ایا یوه هوکړه کېدلی شي که نه، بله کومه کره پایله نه ده ترلاسه شوې.»
ټرمپ زیاته کړې: «که هوکړه شونې وي، ما لومړي وزیر ته وویل چې دا به یو غوره انتخاب وي. که نه وي، نو بیا به وګورو چې پایله به څه وي.» هغه همدارنګه د ایران پر اټومي پروګرام د امریکا د تېر کال بریدونه هم ور یاد کړل. هغه وویل: «سربېره پر دې، موږ په غزه او په عمومي توګه په سیمه کې د شوي لوی پرمختګ په اړه خبرې وکړې.»
د نتنیاهو دفتر وویل چې له ټرمپ سره د خبرو پر مهال لومړي وزیر «د ایران په اړه په خبرو اترو کې د اسرائیلو د دولت پر امنیتي اړتیاوو ټینګار وکړ.»
واک ته د ټرمپ له بیا رسېدو راهیسې د دواړو مشرانو ترمنځ دا اوومه لیدنه د تړلو دروازو تر شا ترسره شوه؛ نتنیاهو د یوې غاړې دروازې څخه ننوت او دودیز تشریفاتي ساتونکي یې هرکلي ته نه وو ولاړ.
نتنیاهو له ټرمپ سره وکتل ترڅو د ایران د اټومي خبرو په اړه د سخت دریځ نیولو غوښتنه وکړي، په داسې حال کې چې منځنی ختیځ لا هم د امریکا د پوځي برید له امله په وېره کې دی. د نتنیاهو دفتر یو عکس خپور کړی چې دواړه مشران په کې لاسونه ورکوي، خو خبریالانو ته د ننوتلو اجازه نه وه ورکړل شوې.
واشنګټن او تهران تېره اونۍ په عمان کې اټومي خبرې بیا پیل کړې. دا خبرې تېر کال د جولای په میاشت کې د ایران او اسرائیلو ترمنځ د ۱۲ ورځنۍ جګړې پر مهال د ایران پر اټومي سایټونو د امریکا له بریدونو وروسته ځنډول شوې وې.