د چين يوې پوځي محکمې د پنجشنبې په ورځ د دغه هېواد د دفاع دوه پخواني وزيران، وې فینګ‌هه (Wei Fenghe) او لي شانګ‌فو (Li Shangfu) د اداري فساد او بډو اخيستلو په تور په اعدام محکوم کړل، خو د سزا پلي کېدل يې د دوو کلونو لپاره ځنډولي  دي.

د شینهوا دولتي خبري اژانس د راپور له مخې، وې فینګ‌هه د بډو اخيستلو او لي شانګ‌فو د بډو اخيستلو او ورکولو په تور مجرم پېژندل شوي دي. دا دواړه کسان د چين د مرکزي نظامي کميسيون پخواني غړي او پخواني دولتي سلاکاران وو.

د محکمې د پرېکړې پر بنسټ، دواړه کسان د عمر تر پایه له خپلو سیاسي حقونو بې برخې شوي او ټولې شخصي شتمنۍ یې هم ضبط شوې دي.

د چين د قوانينو له مخې، کله چې د اعدام د سزا دوه کلن ځنډ پای ته ورسېږي او سزا يې په ټول عمر بند بدله شي، نو دوی به بيا په خپله سزا کې د نور تخفيف یا په مشروط ډول د خوشې کېدو  حق نه لري.