د بورکینافاسو حکومت د جمعې په ورځ په دولتي تلویزیون اعلان وکړ چې له فرانسې سره یې ډیپلوماټیکې اړیکې پرې کړې دي. دا پریکړه له خپل پخواني استعمارګر سره د امنیت، ملي حاکمیت او په کورنیو چارو کې د بهرنۍ مداخلې پر سر له کلونو خرابو اړیکو وروسته، د دواړو هیوادونو ترمنځ شخړه نوره هم پراخوي.
د حکومت د اعلامیې له مخې، دا پریکړه د دواړو هیوادونو ترمنځ د دوه اړخیزو اړیکو له "هر اړخیزې ارزونې" وروسته شوې ده.
دا لویدیځ افریقایي هیواد له تیرو لسو کلونو راهیسې له یوې داسې جګړې سره لاس او ګریوان دی چې زرګونه کسان پکې وژل شوي او په ملیونونو نور بې ځایه شوي دي؛ دا جګړه لومړی له ګاونډي هیواد مالي څخه پیل او بیا بورکینافاسو ته خپره شوه.
د بورکینافاسو د مخابراتو وزیر ګیلبرټ اویډراوګو وویل: "د دوه اړخیز احترام، متقابل باور، په کورنیو چارو کې د نه مداخلې او ملي حاکمیت د اصولو پر بنسټ د اړیکو د پراختیا لپاره اړین شرایط نور شتون نلري."
اویډراوګو زیاته کړه چې دا پریکړه د جون له ۲۶مې نېټې څخه د پلي کېدو وړ ده او دا اقدام له پاریس سره د اړیکو له بیاکتنې وروسته شوی دی.
هغه پر فرانسې تور پورې کړ چې د "تخريبي شبکو" او "ترهګرو" ملاتړ کوي.
د فرانسې د بهرنیو چارو وزارت تر اوسه په دې اړه سمدستي غبرګون نه دی ښودلی، که څه هم پاریس تر دې وړاندې د ترهګرۍ د ملاتړ په اړه لګول شوي تورونه په کلکه رد کړي دي.
