د غزې د روغتیا وزارت د چهارشنبې په ورځ اعلان وکړ چې په تېرو ۲۴ ساعتونو کې د اوربند سربېره، د اسرائیلو په بریدونو کې لږ تر لږه ۱۳ فلسطینیان وژل شوي او ۱۸ نور ټپیان شوي دي.
روغتیايي چارواکو وویل چې د چهارشنبې په ورځ د غزې په مرکزي برخه کې د اسرائیلو په یو هوايي برید کې یو سړی، د هغه مېرمن او شپږ کلنه لور وژل شوي دي. دا برید په "دیر البلح" کې پر یوې ودانۍ شوی چې په پایله کې یې "عمر ابو قاسم"، د هغه مېرمن "اسما" او شپږ کلنه لور یې "حبیبه" وژل شوي دي. د دوی زوی له دغه برید څخه ژوندی پاتې شوی خو ټپي دی.
همداراز د غزې ښار په "شیخ رضوان" سیمه کې هم په یو برید کې یو تن وژل شوی دی. د روغتیا وزارت د معلوماتو له مخې، د اوربند له پیل راهیسې د اسرائیلو په بریدونو کې ۱۱۲۳ فلسطینیان وژل شوي او ۳۶۱۶ نور ټپیان شوي دي.
د اوربند د خبرو ځنډېدل
دا تاوتریخوالی په داسې حال کې زیاتیږي چې د حماس چارواکو د سې شنبې په ورځ په قاهره کې د اوربند د خبرو یو بل پړاو پای ته ورساوه. دا خبرې چې د مصر، ترکیې او قطر په منځګړیتوب کیږي، موخه یې د امریکا د ولسمشر ډونالډ ټرمپ د سولې پلان د دویم پړاو پر مخ وړل دي.
د باخبره سرچینو په وینا، دا خبرې د حماس پر بې وسلې کولو او له غزې څخه د اسرائیلي ځواکونو پر وتلو متمرکزې وې، خو کوم ځانګړی پرمختګ پکې نه دی شوی. د دغه پلان په دویم پړاو کې د یوې تخنیکي (ټیکنوکراتې) کمېټې لخوا د غزې اداره کول او د یو نړیوال امنیتي ځواک ځای پر ځای کول شامل دي.
اندونیزیا، مراکش، قزاقستان، کوسوو او البانیا د دغه نړیوال ځواک لپاره د سرتیرو ورکولو ژمنه کړې، خو د خبرو اترو د ځنډ له امله لا هم سرتیري نه دي استول شوي.
د اوربند پر سر اختلاف
د غزې لپاره د سولې استازي نیکولای ملادینوف وویل چې د اکتوبر اوربند "په نیمګړې توګه" روان دی او سرغړونې ترې کیږي. بلخوا د حماس چارواکي "باسم نعیم" ملادینوف تورن کړ چې په خبرو کې د اسرائیلو پلوي کوي او د اوربند له سرغړونو یې سترګې پټوي.
د سولې د پلان لومړی پړاو دا و چې اسرائیلي ځواکونه باید شاته ولاړ شي، خو اسرائیلو برعکس خپل پرمختګ ته دوام ورکړی او اوس د غزې له ۶۰ سلنې څخه ډېره برخه تر اشغال لاندې لري. حماس ټینګار کوي تر هغه چې د لومړي پړاو شرطونه پوره نشي، دویم پړاو ته نه ځي.
د ۲۰۲۳ کال د اکتوبر له ۸مې راهیسې پر غزه د اسرائیلو په بریدونو کې د وژل شویو کسانو ټول شمېر ۷۳۲۴۶ ته رسیدلی او ۱۷۳۷۲۷ نور ټپیان شوي دي. همداراز د غزې ۹۰ سلنه ملکي زیربناوې په بشپړ ډول ویجاړې شوې دي.
