تورکیې په انرژۍ کې د لنډ مهاله لارې نقشه وټاکله. د انرژۍ او طبیعي زیرمو وزارت د ۲۰۲۴-۲۰۲۸ ستراتیژیک پلان جزییات هم روښانه شول. هدف دا دی چې په نړۍ کې د انرژۍ په برخه کې روان پرمختګونه په پام کې نیولو سره، د تورکیې شته سرچینې او ځانګړې اړتیاوې پوره کولو لپاره ګامونه پورته شي.
د اناتولیه خبري اژانس د معلوماتو له مخې، د ستراتیژیک پلان نه هدف د داخلي سرچینو سره تر ۲۰۲۸ م کاله پورې د تولیداتو کچه ۲۷۰ میلیارده کیلوواټ ساعتو ته رسول، د برېښنا په تولید کې د داخلي سرچینو برخه ۶۳ سلنې ته لوړول، په نصب شوي ځواک کې د لمریزې انرژۍ د بریښناکوټونو ظرفیت ۳۳ زره ۱۰۰ میګاواټه ته لوړول، د بادي انرژۍ برېښناکوټونو ظرفیت ۱۹ زره ۳۰۰ میګاواټه ته رسول او د ۴ زره ۸۰۰ میګاواټه اټومي انرژۍ ظرفیت فعالول دي.
په دې چوکاټ کې په هیواد کې د نفتو تولید ۲۱۰ زره بیلرو، د طبعي ګازو تولید ۴۲.۵ میلیونه متر مکعبو، د طبیعي ګاز ذخیره کولو ظرفیت ۱۲ میلیارده متر مکعب ته رسول او د کلني کانونو صادراتو ارزښت ۱۰ میلیارده ډالرو ته لوړول دي.
په پلان کې ۷ موخې او بېلابېل اهداف شامل دي.
د پلان له مخې ، د دوامداره انرژۍ عرضې امنیت تامینول، د بهرني وابستګی کمول، د خالص صفر کاربن تمرکز لرونکې انرژۍ بدلون ترسره کول، خوندي، دوامداره او ارزښت زیاتونکي کانکيندنه، د انرژۍ او کانونو بازارونو ملي او نړیواله اغېزه لوړول، په انرژۍ او طبیعي سرچینو برخه کې د داخلي ټکنالوژیو ملاتړ کول، د اداري وړتیا لوړول تر سرلیک لاندې ۷ موخې او ورسره تړلې ۳۰ اهداف ټاکل شوي دي.
په پلان کې، د دوامداره انرژۍ د عرضي امنیت تامینولو موخې لپاره په برېښنا کې نصب شوي ځواک زیاتول، د برېښنا مصرف او وېش شبکې پیاوړي کول، د نوي کیدونکې انرژۍ د ظرفیت د زیاتولو لپاره د شبکې انعطاف تامینول، د پطرول او ګازو بنسټونو پیاوړې کول، په انرژۍ کې د نړیوالو پانګونو په اړه همکارۍ زیاتول په پام کې نیول شوي دي.
د بهرني وابستګۍ د کمولو په چوکاټ کې اخیستل کېدونکي ګامونه هم د پلان په منځپانګه کې شامل دي. له مخې به یې، د داخلي سرچینو څخه د برېښنا تولید، تېل او ګاز، داخلي سکرو او په بهر کې د انرژۍ او کانونو سرچینو لټون او تولید زیات کړی شي.
د تورکیې د شنې انرژۍ اهدافو په چوکاټ کې اخیستل کېدونکي ګامونه هم د پلان مهمه برخه جوړوي.
د خالص صفر کاربن باندې تمرکز لرونکي بدلون په چوکاټ کې به د برېښنا په تولید کې د پاکې انرژۍ سرچینو برخه زیاته شي، د انرژۍ موثریت فعالیتونه به ډیر شي، په انرژۍ کې به د کاربن کثافت کم شي، د برقي موټرو بدلون ملاتړ کوونکې قوي بنسټ به رامینځته شي، د شنه هایدروجن او نوي کیدونکي ګازو ارزښت زنځیر به وده ومومي.
د خوندي، دوامداره او ارزښت زیاتونکي کانکيندنې موخې په لور به د مهمو او ستراتیژیکو منرالونو په لومړیتوب سره د تورکیې د کانونو پوتانسیل څرګندېږي او اقتصاد ته به داخلېږي.
کانونه به په کور دننه پروسس کیږي او ارزښت به یې لوړیږي. کانکېندنه به د نړیوالو معیارونو سره سم خوندي او چاپېریال ته په حساسه توګه پرمخ ولاړه شي. د کار روغتیا او خوندیتوب کلتور به پراخ شي. د سکتور پورې اړوند ادارې او سازمانونه به لا اغېزمن، شفاف او مدیریت تمرکز لرونکي دولتي خدمت جوړښت ته واوړل شي.
د انرژۍ او کانونو بازارونه به له نړیوالو بازارونو سره یوځای کړای شي او سوداګریز حجم به لوړ شي، او په دې دوو سکتورونو کې به د پانګونې چاپېریال د ښه کولو لپاره ګامونه پورته شي.
سربېره پر دې، په انرژۍ او طبیعي سرچینو برخو کې به د ټکنالوژۍ پرمختګ او د څېړنې او پرمختګ فعالیتونه به ترسره شي، ټکنالوژي او تجهیزات به په ملي امکاناتو سره تولید شي.
پر دې سربېره، د وزارت اداري بنسټ به پیاوړی شي، تړلې او اړوند ادارو اداري مدیریت وړتیا به وده ومومي، د ډیجیټل بدلون او سایبري امنیت بنسټ به پیاوړی شي، د پېښو او بېړنیو حالاتو د مقابلې وړتیا به تقویه شي.
