امریکا یوه ورځ وروسته له هغه پر ایران پراخ هوايي بریدونه پیل کړل چې د هرمز تنګي ته نږدې یو امریکايي جنګي هلیکوپتر وویشتل شو.
د ایران دولتي تلویزیون وویل چې د ایران د ساحل په اوږدو کې په څو ښارونو کې، چې د سیریک ښار او قشم ټاپو هم پکې شامل دي، د چاودنو غږونه او د هوايي بریدونو سایرنونه اورېدل شوي دي.
د امریکا د پوځ مرکزي قوماندانۍ د سه شنبې په ورځ په یوه بیان کې وویل چې دا «د ځان دفاعي بریدونه» د واشنګټن پر وخت د مازدیګر په ۵ بجو د ټرمپ په لارښوونه پیل شول.
مرکزي قوماندانۍ په یوه بیان کې ویلي: "دا ماموریت د ایران د بې ځایه تیري په وړاندې یو متناسب ځواب دی."
د ایران مهر خبري اژانس د اوسېدونکو په حواله د سیریک په سیمه کې د درنو چاودنو راپور ورکړی. د ایران دولتي رسنیو هم راپور ورکړی چې قشم ټاپو او د بندر عباس بندر تر برید لاندې راغلي دي.
ټرمپ د ځواب ورکولو ژمنه وکړه
ډونلډ ټرمپ له اې بي سي نیوز (ABC News) سره په خبرو کې وویل: "زه فکر کوم ځواب ورکول خورا مهم دي. هغوی یو هلیکوپتر وویشت او موږ همدا اوس چې خبرې کوو، ځواب ورکوو."
د امریکا ولسمشر زیاته کړه: "دا د هغه څه ځواب دی چې هغوی تېره شپه زموږ له هلیکوپتر سره وکړل، او زه باور لرم چې ځواب باید خورا پیاوړی او ځواکمن وي، او دا برید همداسې دی."
بلخوا، د اکسیوس (Axios) خبري سایټ د یوه لوړپوړي امریکايي چارواکي په حواله راپور ورکړی چې امریکايي پوځي ځواکونو د هرمز تنګي په شاوخوا کې د ایران پر څو هوايي دفاعي دستګاوو او رادار سیسټمونو بریدونه کړي دي.
اکسیوس ویلي چې په ایران کې د بریدونو دویمه لړۍ «همدا اوس» روانه ده چې پکې د هوايي دفاع او رادار سیسټمونه په نښه کېږي.
