د شمالي اترپردیش ایالت کې د سختو طوفانونو او زورور بارانونو له امله نږدې ۹۰ کسان وژل شوي، په داسې حال کې چې په نوي ډیلي کې د هوا د خرابوالي له امله د الوتنو عملیات هم ګډوډ شول.
چارواکو وویل چې د چهارشنبې په ورځ د هند تر ټولو ګڼ نفوسه ایالت اترپردیش کې د باران، ږلۍ او د سخت طوفان له امله نږدې ۹۰ کسان وژل شوي.
د چارواکو په وینا، په بيلابيلو ولسوالیو کې د مرګ ژوبلې راپورونه ورکړل شوي دي.
د مارچ څخه تر جون پورې د ګرم موسم پر مهال، د موسمي بارانونو تر راتګ مخکې، په دغه شمالي ایالت کې توپانونه عام دي.
د تلویزیون انځورونو ښودلې چې د توپان د سختو بادونو له امله ونې او لوی تبلیغاتي بورډونه له بېخه راایستل شوي او ځینې یې د دوړو او ماتو ټوټو د ورېځو ترمنځ پر موټرو راغورځېدلي، همداراز د سړک غاړې غرفو لرګین فرنیچر یې هم غورځولي دي.
یو چارواکي چې د نوم نه ښودلو په شرط یې له رسنیو سره د خبرو کولو اجازه نه درلوده وویل: "شاوخوا ۸۹ کسان د طوفان، بریښنا او باران پورې اړوند پیښو له امله وژل شوي دي."
د ایالت د مرستندویه ادارې یوه چارواکي رویټرز ته ویلي چې ځینې کسان د ونو او د کورونو د دېوالونو د پرېوتو له امله وژل شوي، خو د ژغورنې د هڅو په اړه یې سمدستي جزییات نه دي ورکړي.
پولیسو د پنجشنبې په سهار په ایکس کې ولیکل، "د اداري چارواکو ټیمونه په دوامداره توګه د اغیزمنو سیمو څارنه کوي."
په عین حال کې، بارانونو د پلازمېنې نوي ډیلي ځینې برخې وځپلې او د اندرا ګاندي په نړیوال هوايي ډګر یې د الوتنو پر تګ راتګ اغېز کړی.
