څارونکې ادارې وايي، په افغانستان کې د انټرنیټ موبایل انټرنټ خدمتونه پرې شوي دي

د افغانستان اوسېدونکو او څارونکو ادارو ویلي، د سې شنبې په ورځ په ټول افغانستان کې د انټرنیټ او ګرځنده ټیلیفون خدمتونه بند وو، خو طالبانو ادارې په دې اړه سمدستي کوم سپیناوی نه دی وړاندې کړی.

پخوا هم طالبانو د انلاین فحشا په اړه اندېښنې څرګندې کړې وې، او چارواکو په وروستیو اوونیو کې ځینو ولایتونو ته د نوري فایبر مزي پرې کړي وو، چې لامل یې اخلاقي اندېښنې بللې وې.

د نیټ بلاکس (NetBlocks) په نوم د انټرنیټ د لاسرسي څارونکې نړیوالې ادارې ویلي، په افغانستان کې د انټرنیټ اتصال د یوې سلنې (۱٪) کچې ته راښکته شوی دی.

نیټ بلاکس رویټرز ته په یوه استولي ایمیل کې ویلي، چې د دوشنبې په ورځ اتصال په پړاوونو کې پرې شو او وروستي پړاو یې د ټیلیفون خدمتونه اغېزمن کړل، چې له انټرنیټ سره ګډې زیربناوې لري.

خصوصي ټلویزیون، طلوع نیوز، چې خپلو لیدونکو ته یې د خپلو خدمتونو د ګډوډۍ په اړه خبرداری ورکړی و، ویلي چې چارواکو د ګرځنده ټیلیفونونو لپاره د 3G او 4G انټرنیټي خدمتونو د بندولو لپاره یوه اوونۍ وخت ټاکلی و او یوازې پخوانی 2G سټنډرډ یې فعال پرېښی دی.

کلاوډ فلیر رادار (Cloudfare Radar)، چې د انټرنیټ د نړیوال ترافیک څارونکې اداره ده، ویلي چې د انټرنیټ په اتصال کې تر ټولو ډېر کمښت په پلازمېنه کابل، ورپسې په لوېدیځ کې هرات او په سوېل کې کندهار کې راغلی دی.

د طالبانو د مشرتابه له خوا، چې مرکز یې په کندهار کې دی، وضع شوي محدودیتونه ورځ تر بلې سختګیرانه کېږي.

په روانه میاشت کې، چارواکو هغه ښځې چې له ملګرو ملتونو سره یې کار کاوه، دفترونو ته له ننوتلو منع کړې. تر دې مخکې ښځې له ډېرو دندو او نجونې له لېسو منع شوې وې.

طالبانو ویلي چې دوی د اسلامي شریعت د خپل تفسیر له مخې د ښځو حقونو ته درناوی کوي.

هغه ښځې چې له کوره بهر په کار کولو له محدودیتونو سره مخ وې، انټرنیټ ته یې د یوې اقتصادي وسیلې په توګه مخه کړې وه چې ځینو ته یې له کوره د کار کولو زمینه برابروله.

خو په وروستیو اوونیو کې، طالبان له امریکایي چارواکو سره په تعامل کې دي، په ځانګړې توګه په افغانستان کې د نیول شویو امریکایي وګړو په اړه، چې یو تن یې د یکشنبې په ورځ خوشې کړ.