ایران د هیواد د ملي امنیت شورا د مشر لاریجاني د ترور د غچ اخیستلو ژمنه وکړه

د ایران د پوځ مشر وایي: "د ملي امنیت د عالي شورا د منشي د ترور په وړاندې د ایران ځواب به پرېکنده او د دښمن  پښیمانه کوونکی وي."

د ایران د پوځ مشر امیر خاتمي خبرداری ورکړی چې په یوه اسرائیلي هوايي برید کې د هیواد د ملي امنیت شورا د  مشر علي لاریجاني د وژل کېدو په بدل کې به "پرېکنده او د دښمن پښیمانه کوونکی" غبرګون وښيي.

سپاه پاسداران، چې د ایران یو پیاوړی پوځي ځواک دی او له پوځ څخه جلا دی، د چهارشنبې په ورځ په یوه بیان کې وویل چې دوی "د شهید ډاکټر علي لاریجاني او د هغه د ملګرو د وینې د غچ اخیستلو په موخه" پر مرکزي اسرائیل توغندي توغولي دي.

تر دې وړاندې د ایران د ملي امنیت عالي شورا د لاریجاني وژل کېدل تایید کړي وو، وروسته له هغه چې اسرائیلو وویل هغه یې په یو هوايي برید کې وژلی دی. په دغه برید کې د هغه زوی او ساتونکي هم وژل شوي دي.

لاریجاني د ایران په سیاست کې یو مخکښ شخصیت و او په تېرو څلورو لسیزو کې یې په دولتي رسنیو، امنیتي بنسټونو او پارلمان کې بېلابېلې لوړې څوکۍ درلودې.

هغه د ۱۹۵۷ کال د جون پر ۳مه د عراق په نجف کې زېږېدلی و. لاریجاني خپل لیسانس د شریف ټیکنالوژۍ له پوهنتون څخه په کمپیوټر ساینس کې ترلاسه کړی و او خپله ماسټري او ډاکټري یې د تهران له پوهنتون څخه په فلسفه کې اخیستې وه.