د هند لومړي وزیر نریندرا مودي یو ځل بیا هغه ادعاوې رد کړې چې ګواکې د امریکا ولسمشر ټرمپ د هند او پاکستان ترمنځه په اوربند کې منځګړیتوب کړی دی. هغه پرته ددې چې د امریکا د ولسمشر ډونالډ ټرمپ نوم واخلي هغه ادعاوې رد کړې چې ګواکې واشنګټن د سولې منځګړیتوب کړی دی.
مودي د پارلمان په یوه غونډه کې د " سندور عملیاتو " په اړه وویل: "هیڅ نړیوال مشر موږ ته د عملیاتو د درولو غوښتنه نه ده کړې." دا عملیات د مې په میاشت کې د پاکستان پر وړاندې پیل شوي وو.
مودي د ټرمپ نوم په ځانګړې توګه یاد نه کړ.
د مې له ۷مې نېټې راهیسې، ټرمپ او د هغه ادارې نږدې ۳۰ ځله ادعا کړې چې امریکا د اټومي وسلو لرونکو ګاونډیو ترمنځ د بشپړ جګړې مخه نیولې ده. اسلاماباد د واشنګټن رول منلی، خو نوی ډیلي یې لا هم ردوي.
لنډ کړکېچ
دا کړکېچ د اپرېل په میاشت کې د هند تر ولکې لاندې کشمیر کې پر سیلانیانو د یو ترهګریز برید نه وروسته پیل شو، چې په ترڅ کې یې ۲۶ کسان، چې ډېری یې هندوان وو، ووژل شول.
هند د دې برید پړه پر پاکستان واچوله، خو اسلاماباد دا تورونه رد کړل.
د مې په میاشت کې د څلورو ورځو سختو جګړو پر مهال د دواړو خواوو له ۷۰ زیات کسان ووژل شول، تر دې چې ټرمپ د اوربند اعلان وکړ.
ټرمپ د دوشنبې په ورځ په سکاټلنډ کې د یوې غونډې پر مهال وویل: "که زه نه وای، اوس به شپږ لویې جګړې روانې وې. هند به له پاکستان سره په جګړه بوخت و."
خو مودي ادعا وکړه چې دا پاکستان و چې د جګړې د درولو غوښتنه یې وکړه.
"هغوی زموږ د بریدونو ګرمۍ احساس کړه،".
د هغه دا څرګندونې وروسته له هغې وشوې چې د کانګرس ګوند د اپوزېسیون مشر راهول ګاندي هغه ته وویل چې په پارلمان کې دې ووایي چې ایا د هند او پاکستان ترمنځه د جګړې د درولو په مسئله کې ډونالډ ټرمپ دروغ وایي."
کشمیر، چې یوه مسلمانه اکثریتي سیمه ده، له ۱۹۴۷ کال راهیسې د هند او پاکستان ترمنځ وېشل شوې ده.
دواړه هېوادونه پر دې سیمه بشپړ ادعا لري او تر اوسه یې دوه جګړې او ګڼې نښتې کړې دي.
د مې میاشتې جګړو دواړه سیالان یوې بلې جګړې ته نږدې کړل، خو ټرمپ په ښکاره د دې د درولو کریډیټ واخیست — یوه نسخه چې اسلاماباد یې منلې خو نوی ډیلي یې په کلکه رد کړې ده.
