د افغانستان او پاکستان ترمنځ د مرګونې جګړې نه وروسته اوربند پر ځای دی.

د پنجشنبې په ورځ د افغانستان او پاکستان ترمنځ په پوله د اوربند هوکړه پر ځای وه، وروسته له هغې چې په پوله ییزو نښتو کې په لسګونو سرتېري او ملکي وګړي ووژل شول.
د افغان لوري په سپین بولدک کې، چې د وروستیو نښتو یو مهم مرکز و، د فرانس پریس اژانس یوه خبریال لیدلي چې دوکانونه بېرته پرانیستل شوي او اوسېدونکي هغو کورونو ته ستنېږي چې د جګړې پر مهال ترې تښتېدلي وو.
د پاکستان په وینا، د دغه ۴۸ ساعته اوربند موخه دا وه چې "د رغنده خبرو اترو له لارې... یوې مثبتې حل لارې" ته د رسېدو لپاره وخت برابر شي.
د چهارشنبې په ورځ د اسلام اباد پر وخت ماښام ۶ بجې   د اوربند له پیل سمدستي وروسته، په افغانستان کې د فرانس پریس خبریالانو په پوله د لنډې مودې لپاره د ډزو غږونه واورېدل.
د ملګرو ملتونو د بشري حقونو مشر، وولکر ترک، د اوربند هرکلی وکړ او پر "دواړو خواوو یې غږ وکړ چې د ملکي وګړو د نور زیان مخه ونیسي او یوې تلپاتې اوربند ته ژمن پاتې شي."
د اوربند له اعلان مخکې، د افغانستان په پلازمېنه کې نورې چاودنې هم وشوې، چې طالبانو حکومت یې پړه پر پاکستان وانه چوله.
تاوتریخوالی تېره اونۍ په کابل او د افغانستان په سوېل ختیځ کې په چاودنو سره پیل شو، چې طالبانو حکومت یې پړه پر اسلام اباد واچوله.
وروسته طالب چارواکو په پوله بریدونه پیل کړل، چې اسلام اباد یې هم د سخت ځواب ورکولو ژمنه وکړه.
د کابل په وینا، د شنبې ورځې راهیسې د ډزو په تبادله کې په لسګونو کسان وژل شوي او د چهارشنبې ورځې له نوي تاوتریخوالي سره ملکي وګړو ته هم مرګ ژوبله اوښتې ده.

په کابل کې پنځه تنه ووژل شول

په رسمي توګه، طالب چارواکو د چهارشنبې ورځې چاودنې د یوه تېلو ټانکر او یوه جنراتور د چاودنو له امله وبللې چې اورلګېدنه یې رامنځته کړې وه.
خو یوه جګپوړي طالب چارواکي د نوم نه ښودلو په شرط فرانس پریس ته ویلي، چې دویمه چاودنه اسلام اباد کړې او غوښتل یې چې "ملکي وګړي په نښه کړي."
پاکستاني امنیتي سرچینو ویلي چې پوځ په کابل کې یوه وسله واله ډله په "دقیقو بریدونو" په نښه کړې، او همدارنګه یې د کندهار په ولایت کې د افغان طالبانو پټنځایونه هم په نښه کړي دي.
په کابل کې د یوې ایټالوي نادولتي موسسې (NGO) چې یو روغتون چلوي، ویلي چې د چهارشنبې په چاودنو کې لږ تر لږه پنځه کسان وژل شوي او ۳۵ نور ټپیان دي.
په افغانستان کې د ایمرجنسي موسسې مشر، دیجان پانیک، په یوه اعلامیه کې ویلي: "موږ ته په امبولانسونو کې د ټپیانو راوړل پیل شول، او موږ خبر شو چې زموږ له روغتون څخه څو کیلومتره لرې چاودنې شوې دي."
دغې موسسې ویلي چې ټپیانو د چرو، سختو ضربو او سوځېدنې ټپونه لرل، چې د ۱۰ کسانو روغتیايي وضعیت نازک دی.
په کابل کې د فرانس پریس خبریالانو ویلي، د چاودنو له امله د برېښنا مزو ته د زیان رسېدو له کبله د شپې او د پنجشنبې تر سهاره د کابل په ځینو سیمو کې برېښنا نه وه.
د دې میاشتې مرګونی تاوتریخوالی د دواړو هېوادونو ترمنځ د کړکېچنو اړیکو، په ځانګړي توګه د امنیتي مسایلو پر سر، وروسته رامنځته شوی.
اسلام اباد، چې د خپلو امنیتي ځواکونو پر وړاندې د بریدونو له بیا ډېرېدو سره مخ دی، پر افغانستان تور لګوي چې د پاکستاني طالبانو (TTP) په مشرۍ وسله والو ته پناه ورکوي، خو کابل دا تورونه ردوي.
په افغانستان کې د تېرې اونۍ چاودنې په داسې حال کې وشوې چې د طالبانو لوړپوړی دیپلومات د پاکستان ګاونډي او سیال هېواد، هند ته په بې ساري سفر تللی و.