د ټرمپ حکومت د فدرالي قانون د تفسیر په پراخولو سره په امریکا کې په قانوني توګه میشتو مهاجرینو لپاره هم د عامه ګټو پروګرامونو ته لاسرسی محدود کړ.
د امریکا متحده ایالاتو د روغتیا او بشري خدماتو وزارت د پنجشنبې په ورځ اعلان وکړ چې دوی د لسیزو پخوانۍ پالیسیو په لغوه کولو سره "فدرالي عامه ګټې" پروګرامونه محدود کړي ، او ۱۳ نوي کټګوریو په اضافه کولو سره محدودو ګټګوریو شمیر ۴۴ ته لوړ کړی دی.
په دې نویو شامل شویو پروګرامونو کې هیډ سټارټ، د نشه یي توکو د رغونې خدمات، د کورنۍ پلان جوړونې لپاره ټایټل ایکس، د روغتیايي کارکوونکو مرستې، او د بې کوره خلکو لپاره د مرستې پروګرامونه شامل دي.
د روغتیا او بشري خدماتو وزیر، رابرټ ایف کینیډي جونیئر (RFK Jr)، د دې بدلونونو ملاتړ وکړ او ویې ویل: "ډېر وخت وشو چې حکومت د امریکایانو د سخت کار له مالیاتو څخه د غیر قانوني مهاجرت هڅولو لپاره کار اخیستی دی."
دا د ولسمشر ډونالډ ټرمپ د غیر قانوني مهاجرت پر وړاندې د پراخې مبارزې یوه برخه ده.
سره له دې چې اداره وايي دا اقدامات د هغو کسانو لپاره دي چې په غیر قانوني توګه په هېواد کې میشت دي، خو ځینې اقداماتو دایمي اوسېدونکي او نور قانوني اوسېدونکي هم اغېزمن کړي دي.
د قانون له مخې، ډېری مهاجرین لا دمخه د فدرالي ګټو لکه میډیکېډ او ټولنیز امنیت لپاره وړ نه دي. د ۱۹۹۶ کال د شخصي مسؤلیت او د کار فرصت بیا رغونې قانون د قانوني دایمي اوسېدونکو لپاره په ډېرو ګټو پنځه کلن بندیز ولګاوه او نور یې په بشپړ ډول منع کړل.
قانون دا فدرالي ادارو ته پرېښوده چې معلومه کړي چې کوم پروګرامونه "فدرالي عامه ګټې" ګڼل کېږي تعریف کړي. د روغتیا او بشري خدماتو وزارت په ۱۹۹۸ کال کې یو تفسیر خپور کړی و چې ۳۱ پروګرامونه یې لیست کړي وو.
اوس دغه وزارت وايي چې دغه لارښوونه په ناسم ډول ځینې هغه مهاجرینو ته لاسرسی ورکړی و چې قانوني وړتیا یې نه درلوده.
نوی تفسیر به د فدرالي ثبت په خپرېدو سره نافذ شي، چې د ۳۰ ورځو لپاره به د عامه نظر ورکولو موده ولري. د روغتیا او بشري خدماتو وزارت وویل چې نوی لیست بشپړ نه دی او د اغېزمنو پروګرامونو لپاره به نورې لارښوونې هم خپرې شي.
