د سمندري امنیتي سرچینو په وینا، د پنجشنبې په ورځ د یمن حوثیانو لخوا د یوناني کښتۍ ایټرنټي سي ډوبولو وروسته په سور سمندر ددې کښتې درې تنه عمله او یو امنیتي افسر ژوندي وژغورل شول. د راپورونو له مخې د عملې ځینې ورک شوي غړي د حوثیانو لخوا نیول شوي دي.
هغه کسان چې د پنجشنبې په ورځ وموندل شول، له ۴۸ ساعتونو څخه زیات په اوبو کې پاتې وو. لا هم ۱۱ کسان ورک دي.
د یونان په مرکز کې د سمندري خطرونو د مدیریت د شرکت 'دیپلوس' چارواکی نیکوس جورګوپولوس، وویل: "ددې کسانو ژغورل موږ ته نور هم جرئت راکوي چې د ورک شویو کسانو د موندلو لپاره خپلې هڅې دوامدارې کړو، لکه څنګه چې د یوناني بېړۍ چلونکي غوښتنه کړې وه، او دا ښيي چې زموږ د لټون پلان سم و."
ایټرنټي سي د دې اونۍ په اوږدو کې د حوثي ډلې لخوا په سمندر کې ډوبه شوې دویمه یوناني بار وړونکې بېړۍ ده. حوثیان دغه بریدونه، غزې جګړې کې د فلسطینیانو سره د یووالي په توګه بولي او په سیمه کې د څو میاشتو ارامۍ پای ته ورسوله.
په یمن کې د امریکا ماموریت پر حوثیانو تور لګولی چې د بېړۍ عمله یې تښتولې او د هغوی د سمدستي خوشې کولو غوښتنه یې کړې ده.
د حوثیانو پوځي ویاند د چهارشنبې په ورځ، په یوه تلویزیوني وینا کې وویل چې د یمن سمندري ځواکونو د بېړۍ د عملې د یو شمېر کسانو د ژغورلو لپاره اقدام کړی، هغوی ته یې طبي پاملرنه کړې او خوندي ځای ته یې انتقال کړي دي.
ایټرنټي سي د چهارشنبې په ورځ پرې د برید نه وروسته ډوبه شوه، څو ورځې وروسته له هغې چې حوثیانو د 'ماجیک سی' په نوم بېړۍ وویشتله او ډوبه یې کړه. دې بریدونو هغه کمپاین بیا راژوندی کړ چې د ۲۰۲۳ کال په نوامبر کې پیل شو، چې له مخې یې تر ۱۰۰ زیاتې بېړۍ په نښه شوې دي.
د دې اونۍ په اوږدو کې په نښه شوې دواړه بېړۍ د لایبریا بیرغ لاندې روانې وې او د یوناني شرکتونو لخوا اداره کېدې. د 'ماجیک سی' ټوله عمله د بېړۍ له ډوبېدو مخکې ژغورل شوې وه.
ایټرنټي سي د دوشنبې په ورځ د سمندري ډرونونو او د چټکو کښتیو څخه د راکټ توغول په واسطه په نښه شوه. څلور کسان وژل شوي ګڼل کېږي، د سمندري امنیت سرچینې وايي چې هغوی په بریدونو کې وژل شوي دي. که دا تایید شي، نو دا به په سیمه کې د ۲۰۲۴ کال د جون راهیسې لومړنۍ مرګ ژوبله وي.
د سې شنبې په سهار د دویم برید وروسته، د بېړۍ عمله اړ شوه چې ځانونه اوبو ته وغورځوي. د چهارشنبې له سهار راهیسې د ژغورنې ډلې د هغوی په لټه کې دي.
د بېړۍ چلونکي 'کاسموشیپ منیجمنټ' شرکت د رویټرز د نظر غوښتنې ته ځواب نه دی ویلی.
