په پاکستان کې د هند د هوايي بریدونو په ترڅ کې لږ تر لږه ۲۶ ملکي وګړي وژل شوي دي. دا خبره پاکستاني مقاماتو کړې ده . د بله پلوه اسلام آباد خبرداری ورکړ چې دواړه اټومي وسلو لرونکي ګاونډیان د پراخې جګړې پر لور روان دي.
نوي ډیلي وویل چې دا بریدونه د "ترهګرو کمپونو" په نښه کولو لپاره ترسره شوي، چې د اپرېل په ۲۲مه د هند تر ولکې لاندې کشمیر کې د خونړي برید وروسته ترسره شول، خو اسلام آباد وویل چې ملکي سیمې بمبار شوې، چې له امله یې ۲۶ څخه زیات کسان وژل شوي او ۴۶ نور ټپیان شوي دي.
پاکستان همدارنګه ادعا کړې چې د دې بریدونو په ځواب کې یې پنځه هندي جنګي الوتکې غورځولې دي. په ورته وخت کې، د هند تر ولکې لاندې کشمیر کې ځايي چارواکو ویلي چې درې جنګي الوتکې غورځېدلې دي، خو نوي ډیلي په دې اړه رسمي تبصره نه ده کړې.
د تاوتریخوالي په زیاتېدو سره، هند او پاکستان د خپلې لانجمنې پولې په اوږدو کې درانه توپچي بریدونه تبادله کړي دي. دواړو خواوو ته د مرګ ژوبلې د اوښتو راپورونه ورکړل شوي دي. هند وویل چې د پاکستاني توپچي بریدونو له امله درې ملکي وګړي د کشمیر په سرحدي سیمه کې وژل شوي دي.
اسلام آباد مخکې راپور ورکړی و چې په بریدونو کې اته ملکي وګړي، چې یو ماشوم هم پکې شامل دی، وژل شوي دي. د فرانس پریس خبریالانو د پاکستان تر ولکې لاندې کشمیر او پنجاب کې د څو درنو چاودنو غږونه اورېدلي دي.
په مظفرآباد کې، چې د پاکستان تر ولکې لاندې کشمیر مرکزي ښار دی، پوځ د یوې جومات شاوخوا سړکونه تړلي و، چې اسلام آباد ویلي و د برید هدف و. د څو کورونو په دیوالونو کې د چاودنو نښې لیدل کېدې.
له دې لږ وروسته، د هند پوځ پاکستان د کنټرول کرښې په اوږدو کې په "بې توپیره" ډزو تورن کړ، چې د فرانس پریس خبریالانو د مرمیو د لګېدو سره د اور لمبې ولیدلې. "درې بې ګناه ملکي وګړي وژل شوي دي،" د هند پوځ وویل، او زیاته یې کړه چې دوی په "متناسب ډول" ځواب ورکوي.
د پاکستان لومړي وزیر شهباز شریف د هند برید "بې پروایي" او "بزدلانه" وباله او ویې ویل چې "دا وحشیانه عمل به بې ځوابه پاتې نه شي."
بهرنیو ډیپلوماتانو د دواړو هیوادونو پر مشرانو فشار راوړی چې د جګړې څخه لاس واخلي . چین د پاکستان پر وړاندې د هند بریدونو ته د خواشینۍ او اندېښنې څرګندونه وکړه او دواړه خواوې یې د زغم ښودلو ته وهڅولې.
د ملګرو ملتونو د مشر انتونیو ګوتریش ویاند، سټیفان دوجاریک، په یوه بیان کې وویل: "نړۍ د هند او پاکستان ترمنځ پوځي شخړه نشي زغملی." هغه زیاته کړه چې ګوتریش د "اعظمي زغم" غوښتنه کړې ده.
د امریکا ولسمشر ډونلډ ټرمپ په واشنګټن کې خبریالانو ته وویل چې هیله لري جګړه "ډېر ژر پای ته ورسېږي." د امریکا د بهرنیو چارو وزیر مارکو روبیو د بریدونو وروسته د نوي ډیلي او اسلام آباد له لوړپوړو امنیتي چارواکو سره خبرې کړې دي.
هند د چهارشنبې په ورځ د ملکي دفاع څو تمرینونه ترسره کول پلان کړي و، په داسې حال کې چې د پاکستان په پنجاب کې ښوونځي تړل شوي و. دا خبره د ځايي حکومت چارواکو کړې ده.
دغه بریدونه یوازې څو ساعته وروسته له هغه ترسره شول چې هند لومړي وزیر مودي وویل د هند له پولو څخه به پر پاکستان اوبه بندې شي. پاکستان خبرداری ورکړی و چې د هغو سیندونو سره لاس وهنه چې له هند څخه د دې خاورې ته بهېږي، به د "جګړې عمل" وګڼل شي.
