د تورکیې د پارلمان رئیس، نعمان کورتولموش، له ملګرو ملتونو څخه د اسرائیل د غړیتوب د ځنډولو غوښتنه وکړه. هغه د فلسطیني بندیانو لپاره د اعدام د سزا د قانون پر طرحې نیوکه وکړه او د یوې تاریخي بېلګې په توګه یې د سویلي افریقا د اپارټایډ (نژاد پرستۍ) د دورې په وړاندې نړیوال اقدام یاد کړ.
کورتولموش په استانبول کې د بین الپارلماني اتحادیې (IPU) د ۱۵۲مې عمومي غونډې ته په وینا کې، وویل چې نړیوال سیستم پخوا هم د اپارټایډ پر وړاندې اقدام کړی و او په ۱۹۷۴ کال کې یې په ملګرو ملتونو کې د سویلي افریقا غړیتوب وځنډاوه.
هغه استدلال وکړ چې اسرائیل اوس ورته کړنې ترسره کوي او پوښتنه یې وکړه: "ایا دا اپارټایډ نه دی چې په یوه هیواد کې د فلسطینیانو لپاره یو قانون او د اسراییلیانو لپاره بل قانون پلی کیږي؟"
کورتولموش پر ملګرو ملتونو هم نیوکه وکړه او ویې ویل چې دغه سازمان د وروستیو شخړو په مخنیوي کې پاتې راغلی او په ځانګړي ډول په غزه کې د تاوتریخوالي د مخنیوي لپاره بې اغیزې شوی دی. هغه زیاته کړه: "له بده مرغه، ملګري ملتونه په یو داسې نړیوال بنسټ بدل شوي چې یوازې د ځواکمنو هیوادونو د غوښتنو سره سم پر مخ وړل کیږي."
د اصلاحاتو غوښتنه
نوموړي دې ته په اشارې سره چې د منځني ختیځ ډیری هیوادونه د خپل حاکمیت له نقض سره مخ شوي، ټینګار وکړ چې ټول هیوادونه برابر حاکمیتي حقوق لري.
د غونډې په څنډه کې، هغه د عمان د شورا د رئیس خالد المعولي سره وکتل، د عمان له منځګړیتوب څخه یې مننه وکړه او په پاکستان کې یې (د ایران او امریکا ترمنځ) د خبرو اترو د بیا پیل غوښتنه وکړه ترڅو اوسنی اوربند په یوه دایمي اوربند بدل شي.
هغه خبرداری ورکړ چې د اسرائیل اقدامات د خلیج د هیوادونو او ایران ترمنځ د دښمنۍ د زیاتیدو خطر رامنځته کوي.
کورتولموش یادونه وکړه چې تورکیه د څلورم ځل لپاره د بین الپارلماني اتحادیې (IPU) د عمومي غونډې کوربه توب کوي، چې په استانبول کې یې د نړۍ د شاوخوا ۱۵۵ هیوادونو استازو ګډون کړی دی.
