د فرانسې ولسمشر امانویل مکرون پر نتنیاهو سخته نیوکه وکړه او وویل چې ملکي وګړو او یرغمل شوو کسانو برخلیک باید هغه ته پرینښودل شي.

د فرانسې ولسمشر امانوېل مکرون د اسرائیلو د لومړي وزیر بنیامین نتنیاهو پر حکومت د غزې د نسل وژنې په اړه د چلند له امله نیوکه کړې او ویلي یې دي چې د ملکي وګړو او یرغمل شویو برخلیک "باید د هغو کسانو په لاس کې پرېنښودل شي چې د یرغملو ازادول ورته لومړیتوب نه لري."

مکرون د چهارشنبې په ورځ فرانس ۲۴ دولتي تلویزیون ته وویل: "د نتنیاهو لومړی لومړیتوب د یرغملو خوشې کول نه دي، که نه نو هغه به پر غزه ښار وروستي بریدونه نه وای پیل کړي او نه به یې په قطر کې پر مرکچیانو برید کړی وای."

هغه ټینګار وکړ چې "ټولیزه جګړه ملکي وګړي وژني، خو حماس نه شي له منځه وړلی،" او زیاته یې کړه چې د اسرائیلو د پرله پسې بریدونو سره سره، دغه فلسطیني ډله لا هم د جګړې توان لري.

مکرون په غزه کې د اوربند لپاره د فرانسې پر غوښتنې یو ځل بیا ټینګار وکړ او ویې ویل چې د یوه فلسطیني دولت په رسمیت پېژندلو موخه د سولې د بهیر بیا را ژوندي کول دي.

د فرانسې ولسمشر همدارنګه له متحده ایالاتو، "هغه یوازیني هېواد چې د فشار راوړلو لپاره خورا کره وسیلې لري،" وغوښتل چې پر اسرائیلو فشار راوړي ترڅو خپله تګلاره بدله کړي.

مکرون وویل، که واشنګټن اقدام ونه کړي، نو د اروپايي ټولنې هېوادونه به پر بندیزونو غور وکړي.

هغه خبرداری ورکړ چې د اشغال شوې لوېدیځې غاړې د ضمیمه کولو لپاره د اسرائیلو هر ډول اقدام به د فرانسې لپاره "سره کرښه" وي، او ویې ویل چې په بیت المقدس کې د فرانسې د قونسلګرۍ تړل به یوه "لویه تېروتنه" وي.