هندي چارواکي ښايي په نږدې ورځو کې یو لنډمهاله راپور خپور کړي، خو دا د قربانیانو د کورنیو لپاره د ناهیلۍ لامل شوی، ځکه هغوی د پېښې د علت په اړه د وروستۍ او بشپړې پایلې په تمه وو.
د تېر کال د ایر انډیا په الوتکه کې د وژل شویو کسانو کورنۍ د جمعې په ورځ د پېښې ځای ته د دغې غمجنې پېښې د تلین لمانځلو لپاره راټولې شوې وې، په داسې حال کې چې لا هم د پېښې د اصلي علت په اړه د ځوابونو په تمه دي.

د ۲۰۲۵ کال د جون پر ۱۲مه، یوه بوینګ ۷۸۷ (Boeing 787) الوتکه د هند په لویدیځ ښار احمد آباد کې له الوتنې لږ وروسته پر یوه طبي کالج وغورځېده، چې پکې ۲۶۰ کسان ووژل شول. دا په تیره یوه لسیزه کې ترټولو خونړۍ هوایي پېښه وه.

هندي چارواکي په پام کې لري چې په نږدې ورځو کې یو لنډمهاله راپور خپور کړي، خو د قربانیانو خپلوان وايي چې هغوی د وروستي او هراړخیز راپور تمه درلوده.

سوریش پټني، چې یو ډرایور دی، هغه ځای ته راغلی و چیرته چې الوتکې اور اخیستی و او د هغه تنکی زوی 'اکاش' یې د کورنۍ د چایو په یو کوچني هوټل کې لولپه کړی و. پټني (AFP) ته وویل: "موږ نن دلته یوازې د هغه د لومړي تلین د یادولو لپاره راغلي یو. هغه یو تکړه شاګرد و او کولی یې شول چې په راتلونکي کې یو څه شي." پټني د اکاش یو لوی انځور او په ګلانو پوښل شوې مجسمه هلته د یادګار په توګه ایښې وه. په دې پېښه کې ۲۴۱ تنه په الوتکه کې او ۱۹ تنه پر ځمکه وژل شوي وو.

د بکسونو، جامو ټوټې او یوه ویلي شوې بوټ لا هم په سوځېدلې ځمکه کې تر خاورو لاندې ښکاري. پټني زیاته کړه: "کله چې زموږ له کور د پاسه کومه الوتکه تېریږي، ډیر درد رانږدې کوي... موږ ته هر وخت د هغوی مخونه او یادونه را یادیږي."

'د زړه د ډاډ لپاره مهم'
نږدې، یوه ښځه چې د خپلو وژل شویو عزیزانو انځور یې په غېږ کې نیولی و، ژړل. د قربانیانو خپلوانو تمه لرله چې د جمعې تر ورځې پورې به یو وروستی راپور خپور شي، خو د تحقیقاتو د دوام له امله د الوتکو د پېښو د څېړنې ادارې (AAIB) یوازې د یو لنډمهاله راپور د خپرولو خبره کړې ده.

د پېښې یو میاشت وروسته په لومړني راپور کې ویل شوي وو چې د الوتکې ماشینونو ته د تېلو جریان بند شوی و، چې دې چارې د پیلوټ د تېروتنې یا حتی ځان وژنې پوښتنې راپورته کړې وې. خو په هغه راپور ډیرې نیوکې وشوې ځکه چې دا یې نه وو روښانه کړې چې د تېلو جریان ولې بند شوی و—ایا دا د پیلوټ غلطي وه که تخنیکي ستونزه؟

نیلیش جوشي، چې خپله میرمن 'کامیني بین' یې په دې پېښه کې له لاسه ورکړې، وویل: "چارواکي ولې د دې پېښې په څېړلو کې دومره وخت نیسي؟ د راپور خپرېدل د هغو خلکو لپاره چې خپل عزیزان یې له لاسه ورکړي، د زړه د تسلۍ (Closure) لپاره مهم دي."

په دې الوتکه کې یوازې یو مسافر 'وشواش کمار رمیش' ژوندی پاتې شوی، چې وايي تر اوسه د دې پېښې له امله له سختو رواني ستونزو سره مخ دی او په ذهن کې یې بې شمیره پوښتنې دي چې ځواب یې نه موندل کیږي.

وجي سینګال، چې په نږدې روغتون کې کارمند دی او یو له لومړنیو کسانو و چې د ژغورنې لپاره ورغلی و، وايي چې هغه ویروونکی غږ لا هم نه شي هېرولی. هغه وايي: "کله چې مو هڅه کوله جسدونه پورته کړو، جسدونه مکمل نه وو... د چا لاس او د چا پښه به په لاس کې راغله." هغه زیاته کړه چې ډیری خلک له تیاره وروسته دې سیمې ته له ویرې نه راځي.