د اسرائیلو لومړي وزیر بنیامین نتنیاهو ویلي چې سره له دې چې د بندیانو د تبادلې او اوربند د تړون لپاره خبرې روانې دي، اسرائیلیان په غزه کې د جګړې د دوام پرېکړه کړې ده.
نتنیاهو په ټولنیزه رسنۍ ایکس کې په یوه بیان کې ویلي چې په شمالي غزه کې په نښتو کې پنځه اسرائیلي سرتیري وژل شوي او دا د اسرائیلي خلکو لپاره یوه سخته ورځ وه.
لومړي وزیر نتنیاهو زیاته کړه چې دوی په غزه کې د جګړې د موخو ترلاسه کولو لپاره هوډمن دي.
نتنیاهو وویل چې د جګړې موخې دا دي چې ټول بندیان خوشې شي، د حماس پوځي او اداري وړتیا له منځه یووړل شي، او ډاډ ترلاسه شي چې غزه نور اسرائیلو ته ګواښ نه وي. هغه زیاته کړه چې دا مانا لري چې حماس به نور شتون ونه لري.
نتنیاهو وویل چې د دې پایله به دا وي چې ټول اسرائیلي بندیان به خوشې شي، حماس به وځپل شي او له منځه یووړل شي، غزه به نور اسرائیلو ته ګواښ نه وي، او دوی لا هم خپله دنده نه ده بشپړه کړې.
بلخوا، د هاآرتز ورځپاڼې د راپور له مخې، د منځني ختیځ لپاره د امریکا د ولسمشر ډونالډ ټرمپ ځانګړي استازي، سټیو ویتکوف، په یوه بیان کې ویلي چې د اوربند او د بندیانو د تبادلې په اړه مخکې څلور اختلافات موجود وو، خو اوس یوازې یو پاتې دی.
ویټکوف وویل چې دوی هیله لري د دې اونۍ تر پایه داسې یوه موافقه ترلاسه کړي چې د ۶۰ ورځو اوربند ته لاره هواره کړي.
د اسرائیلو پوځ پرون په یوه بیان کې ویلي چې د کفیر لیوا د نتزاح یهودا بټالین پنځه سرتیري په غزه کې وژل شوي دي.
اعلان وشو چې د ۲۰۲۳ کال د اکتوبر له ۷مې نېټې راهیسې، کله چې اسرائیلو په غزه بریدونه پیل کړل، د وژل شویو اسرائیلي سرتیرو شمېر ۸۸۸ ته رسېدلی دی.
