یونیسف (UNICEF) ویلي چې د ۲۰۲۵ کال په اکتوبر کې د اوربند له اعلان راهیسې په غزه کې لږترلږه ۲۶۵ فلسطیني ماشومان وژل شوي دي. دغه بنسټ دا اوربند یو "وژونکی فریب" وباله او خبرداری یې ورکړ چې د جګړې د درولو له رسمي اعلان سره سره تاوتریخوالی لا هم دوام لري.

د یونیسف ویاند جیمز ایلډر د جمعې په ورځ په جنیوا کې خبریالانو ته وویل: "په هغه دوره کې چې ګواکې د زغم او خوندیتوب په نوم وه، له اتو میاشتو څخه زیات هره ورځ په اوسط ډول یو ماشوم وژل شوی دی."

هغه دا اوربند یو "بې رحمه او وژونکی فریب" وباله او پوښتنه یې وکړه چې په داسې حال کې چې ماشومان لا هم مړه کیږي، ایا دا لا هم اوربند ګڼل کیدی شي؟

نوموړي زیاته کړه: "په داسې حال کې چې نړۍ د اوربند په ژبه خبرې کوي، په غزه کې کورنۍ لا هم د خپلو زامنو او لوڼو په ښخولو بوختې دي."

ایلډر وویل چې دا ماشومان په کورونو، ښوونځیو او عامه ځایونو کې، حتی د فوټبال لوبېدو یا کب نیولو پر مهال وژل شوي دي.

هغه وویل: "پدې اونۍ کې: یو دوه کلن هلک د اسرائیلي ځواکونو لخوا په ډزو ووژل شو؛ یو ۱۳ کلن هلک په خپله خیمه کې په ډزو ووژل شو؛ یو ۵ کلن هلک او پلار یې د اسرائیلو په یوه برید کې ووژل شول، او دا لړۍ همداسې دوام لري."

د یونیسف د معلوماتو له مخې، د اکتوبر له میاشتې راهیسې له ۴۰۰ څخه ډیر ماشومان ټپیان شوي هم دي، چې ډیری یې سخت ټپونه لري.

ایلډر د وروستیو پېښو یادونه وکړه چې پکې یوه ۱۲ کلنه نجلۍ په خپله خیمه کې په سینه په مرمۍ وویشتل شوه او یوه ۳ کلنه نجلۍ په خپل کور کې د یوې کواډکوپټر بې پیلوټه الوتکې لخوا په مخ وویشتل شوه.

هغه خبرداری ورکړ چې په سلګونو ماشومان عاجلې طبي تخلیې (بهر ته د درملنې لپاره لېږد) ته اړتیا لري او وویل چې د اړینو درملو پر وړاندې محدودیتونه د ټپي ماشومانو ترمنځ د ناروغیو او د بدن د غړو د پرې کولو (Amputation) خطر زیاتوي.

ایلډر همدارنګه پر غزه د اسرائیلو د جګړې رواني اغیزو ته په اشارې سره وویل: "د غزې د ماشومانو لپاره وېره، زیان او تاوتریخوالی دومره دوامداره شوي چې صدمه (Trauma) نور د دوی په ژوند کې یوه پېښه نه ده؛ بلکې دا د دوی د ماشومتوب په فطرت کې اخښل شوې ده."

نوموړي له حکومتونو او نړیوالو بنسټونو وغوښتل چې اقدام وکړي. هغه لبنان ته هم اشاره وکړه، چیرې چې د یونیسف په وینا د مارچ له ۲مې نېټې راهیسې د جګړې د شدت له امله ۲۴۷ ماشومان وژل شوي او ۹۹۲ نور ټپیان شوي دي.

هغه په پای کې وویل: "ترڅو چې د ماشومانو وژل دوام ولري، هیڅ اوربند مانا نه لري."