د تورکیې ولسمشر د عمان د سلطان هیثم بن طارق سره ټیلیفوني خبرې وکړې

د تورکیې او عمان مشرانو د ایران د جګړې پر مهال د سیمه ییزو تاوتریخوالو د زیاتوالي په اړه خبرې وکړې

رجب طیب اردوغان په یوه ټیلیفوني اړیکه کې خبرداری ورکړ چې له ایران سره جګړه د یوه "بې ساري امنیتي بحران" خطر لري او پر ډیپلوماسۍ یې ټینګار وکړ.

د تورکیې ولسمشر رجب طیب اردوغان او د عمان سلطان هیثم بن طارق په یوه ټیلیفوني اړیکه کې پر دوه اړخیزو اړیکو او سیمه ییزو مسایلو خبرې وکړې.

د تورکیې د عامه اړیکو ریاست د چهارشنبې په ورځ وویل، اردوغان په خپلو خبرو کې ویلي: "پر ایران بریدونو او ورپسې په سیمه کې پر ګاونډیو ورورګلو هیوادونو د ایران ځوابي بریدونو، سیمه د یوه بې ساري امنیتي بحران له خطر سره مخ کړې ده." هغه په ځانګړي ډول ټینګار وکړ چې پر عمان بریدونه "د منلو وړ نه دي."

اردوغان وویل چې تورکیې په اوسنیو ستونزمنو شرایطو کې هم د منځګړیتوب په ګډون ډیپلوماټیکې هڅې نه دي پرېښې او دا ډول هڅې به په راتلونکي کې هم دوام ومومي.

ولسمشر همداراز ټینګار وکړ چې د بنیامین نتانیاهو د حکومت لخوا په اشغال شوي ختیځ بیت المقدس کې د الاقصی جومات ته د مسلمانانو د لاسرسي مخنیوی "د منلو وړ نه دی" او غزه لا هم بشري مرستو ته شدیده اړتیا لري.

هغه زیاته کړه چې د "سولې د بورډ"  هڅې، چې په دې وروستیو کې رامنځته شوی، باید د دوه هیوادونو د حل لارې په هدف دوام ومومي.

اردوغان د روژې له مبارکې میاشتې وروسته د کوچني اختر په مناسبت سلطان ته د نېکو هیلو مراتب هم وړاندې کړل.