د تورکیې د بهرنیو چارو وزارت په راس تنوره کې د آرامکو چورلکې د رالوېدو له امله، چې ۱۴ سعودي وګړي پکې ووژل شول، خپله خواخوږي څرګنده کړه.
تورکیې د سعودي عربستان په ختیځ کې د یوې چورلکې د خونړۍ پېښې له امله دغه هېواد ته تسلیت وړاندې کړی دی.
د تورکیې د بهرنیو چارو وزارت ویلي چې دغه هېواد په راس تنوره کې د یکشنبې ورځې په پېښه کې د "خلکو په مړینه سخت غمجنه" دی.
وزارت په خپله اعلامیه کې ویلي: "موږ په دې دردوونکې پېښه کې وژل شویو کسانو ته د الله تعالی له دربار څخه د رحمت دعا کوو او د هغوی کورنیو او د سعودي عربستان خلکو ته تسلیت مراتب وړاندې کوو."
د تېلو په حیاتي مرکز کې تلفات
د سعودي عربستان رسمي خبري اژانس (SPA) خبر ورکړی چې د دغه هېواد د تېلو د ستر شرکت 'آرامکو' اړوند یوې چورلکې په راس تنوره کې سقوط کړی، چې په پایله کې یې په کې سپاره ۱۴ واړه کسان وژل شوي دي.
د سعودي عربستان رسمي خبري اژانس د سعودي د انرژۍ وزارت د یوې رسمي سرچینې په حواله ویلي چې ټول وژل شوي کسان د سعودي عربستان تابعیت لرونکي وو.
د سعودي د انرژۍ وزارت تایید کړې چې په دې پېښه کې لږ تر لږه ۱۴ کسان وژل شوي او په الوتکه کې هیڅوک ژوندی نه دی پاتې.
یاده چورلکه چې د آرامکو شرکت وه، د یکشنبې په ورځ د سعودي عربستان په ختیځه ساحلي سیمه راس تنوره کې، چې د هرمز تنګي لوېدیځ ته پرته ده، رالوېدلې ده.
د سعودي رسمي خبري اژانس زیاته کړې: "د اړوندو چارواکو په ګډون څېړنې روانې دي ترڅو د چورلکې د رالوېدو لاملونه معلوم کړي." د رپوټونو له مخې، تر اوسه د پېښې لامل نه دی روښانه شوی.
