د تورکیې د استخباراتو مشر ابراهیم کالن د سې شنبې په ورځ قطر ته سفر کړی، ترڅو د امریکا د ولسمشر ډونالډ ټرمپ د غزې د سولې پر پلان خبرې وکړي.
د سرچینو په وینا، ټاکل شوې چې کالن د حماس او اسرائیلو ترمنځ په هغو روانو خبرو اترو کې له ښکېلو اړخونو سره وګوري چې د قطر، امریکا او مصر په منځګړیتوب ترسره کېږي، او تمرکز به یې په دې فلسطیني سیمه کې د جګړې د پای ته رسولو لپاره د ټرمپ پر وړاندیز شوي پلان وي.
د قطر د بهرنیو چارو وزارت ویاند ماجد الانصاري په دوحه کې یوې خبري غونډې ته وویل چې تورکیه به د دې جامع پلان په اړه په خبرو اترو کې ګډون وکړي، او ټینګار یې وکړ چې د قطر، مصر او تورکیې هڅې به په ګډه همغږې شي ترڅو دا شخړه پای ته ورسوي.
ټرمپ د دوشنبې په ورځ په واشنګټن ډي سي کې د اسرائیلو له قاتل لومړي وزیر بنیامین نتنیاهو سره په یوه ګډه خبري غونډه کې د غزې د اوربند د خپل پلان مهم ټکي په ګوته کړل.
په دې شل ماده ييز پلان کې د نورو مواردو ترڅنګ، د یو شمېر فلسطیني بندیانو په بدل کې د ټولو اسرائیلي برمته ګانو خوشې کول، د فلسطیني مقاومت ډلې حماس بې وسلې کول، او د یوې داسې فلسطیني کمېټې جوړول شامل دي چې دا سیمه په لنډمهاله توګه اداره کړي.
