چارواکو ویلي، په کییف کې یوه وسله وال په یوه سوپرمارکېټ کې وسله وال برید کړی چې له امله يي لږ تر لږه پنځه کسانو ژوند د لاسه ورکړی او ګڼشمیر ټپيان شوي دي.
د اوکراین ولسمشر ولادیمیر زیلینسکي ویلي، چې د شنبې په ورځ د پلازمېنې په یوه استوګنیزه سیمه کې په ډزو کې لږ تر لږه پنځه کسان وژل شوي او لس نور د ټپونو او صدمې له امله روغتون ته لېږدول شوي دي.
زیلینسکي پر ټولنیزو رسنیو ویلي: "په کییف کې هغه بریدګر چې پر ملکي وګړو یې ډزې کړې وې، له منځه یوړل شو." هغه د قربانیانو "کورنیو او خپلوانو ته تسلیت" وړاندې کړ.
د یونیان خبري اژانس لخوا خپره شوې ویډیو کې یو سړی ښکاري چې ټوپک یې په لاس کې دی او د اپارتمانونو یوې ودانۍ ته نږدې له نږدې واټن څخه پر یوه کس ډزې کوي.
د کییف ښاروال ویتالي کلیچکو ویلي، شکمن کس وروسته یوه سوپرمارکېټ ته ننوتی، چېرته چې د ډزو غږونه اورېدل شوي دي.
زیلینسکي په ټولنیزو رسنیو کې په خپل پوسټ کې ویلي: "څلور برمته شوي کسان ژغورل شوي دي."
د اوکراین پولیسو ویلي، چې ځانګړي ځواکونه یې د ښار په جنوب کې د هولوسیفسکي ولسوالۍ د پېښې ځای ته استول شوي دي.
د بریدګر انګېزه نه ده معلومه او زیلینسکي ویلي، چې "ټول شرایط تر څېړنې لاندې دي" او د "چټکو څېړنو" غوښتنه یې کړې ده.
