د پاکستان په بلوچستان او خیبر پښتونخوا ایالتونو کې د ځای پر ځای شویو ماینونو چاودنو کې دوه تنه وژل شوي او ۲۵ نور ټپیان دي
دا وروستي بریدونه یوه ورځ وروسته له هغه کیږي چې د هیواد په ناکراره خیبر پښتونخوا ایالت کې څلور پولیس افسران ووژل شول.
چارواکي وایي، د دوشنبې په ورځ د پاکستان په سوېل لوېدیځ بلوچستان ایالت کې په یوه چاودنه کې لږ تر لږه یو تن ووژل شو او ۱۶ نور ټپیان شول.
د پنجګور ولسوالۍ د پولیسو د کنټرول خونې یوه چارواکي د ټیلیفون له لارې وویل چې چاودنه په دې ولسوالۍ کې شوې ده.
دغه چارواکي وویل، دا "ظاهراً د ځای پر ځای شوي ماین چاودنه وه چې په چټکان بازار کې یې ملکي وګړي په نښه کړي وو."
پولیسو او امنیتي ځواکونو سمدستي سیمه کلابنده کړه او د سیمې د امنیت او د شواهدو راټولولو لپاره یې د پلټنې عملیات پیل کړل.
د ځایي ټلویزیون جیو نیوز د راپور له مخې، پولیس وایي، د دوشنبې په ورځ په یوې بلې چاودنه کې، د هیواد په شمال لوېدیځ خیبر پښتونخوا ایالت کې، د لکي مروت په ولسوالۍ کې د سمنټو د یوې فابریکې پر موټر د ځای پر ځای شوي ماین چاودنې له امله یو تن ووژل شو او نهه نور ټپیان شول.
د دواړو بریدونو مسؤلیت سمدستي کومې ترهګرې ډلې نه دی منلی.
دا پیښې یوه ورځ وروسته له هغه کیږي چې د خیبر پښتونخوا په ایالت کې په دوو جلا بریدونو کې څلور پولیس ووژل شول.
د یکشنبې په ورځ، د لکي مروت په ولسوالۍ کې په یوه شکمن ترهګریز برید کې درې پولیس افسران ووژل شول.
د سیمه ییزې ملکي ادارې یوه چارواکي د نوم نه ښودلو په شرط وویل چې پولیسو له برید وروسته د پلټنې او ځپلو عملیات ترسره کړل، چې په پایله کې یې د نښتې پرمهال یو ترهګر ووژل شو او یو پولیس افسر هم ټپي شو.
دغه چارواکي زیاته کړه چې په سیمه کې عملیات لا هم روان دي.
پاکستان په وروستیو کلونو کې، په ځانګړې توګه په خیبر پښتونخوا او بلوچستان کې د ترهګریزو بریدونو له زیاتوالي سره مخ دی.
