د امریکا ولسمشر ډونالډ ټرمپ ویلي چې امریکا د چهارشنبې په ورځ له چین سره د سوداګرۍ یوه موافقه لاسلیک کړې، خو د دې موافقې جزئیات یې نه دي څرګند کړي.

ټرمپ د پنجشنبې په ورځ په سپینه ماڼۍ کې د "یو لوی ښکلی قانون" په نوم غونډه کې وویل: "ښه، موږ پرون له چین سره موافقه لاسلیک کړه، سمه ده؟ یوازې له چین سره مو لاسلیک کړه."

هغه زیاته کړه: "په دې چینایي موافقه کې، موږ د چین پرانیستل پیل کړي دي. داسې څه چې مخکې هېڅکله نه وو ممکن."

د امریکا او چین چارواکو د روانې میاشتې په پیل کې په لندن کې سره ولیدل ترڅو د تعرفو په اړه خبرې وکړي.

د اپرېل په میاشت کې، امریکا د چین څخه واردېدونکو توکو باندې د پام وړ تعرفې پلي کول پیل کړل. خو د مې په میاشت کې، امریکا او چین د لومړنیو ۹۰ ورځو لپاره د جزایي تعرفو د پراخ کمښت په اړه موافقه وکړه.

ټرمپ وویل چې کېدای شي امریکا له هند سره هم یوه موافقه لاسلیک کړي.

هغه زیاته کړه چې امریکا د تعرفو له لارې ۸۸ میلیارده ډالر راټول کړي دي او ویې ویل: "دا ښکلی کار نه دی؟ ۸۸ میلیارده."

د نادره معدني موادو انتقالات

د سپینې ماڼۍ یوه چارواکي تایید کړه چې امریکا او چین د جنیوا د موافقې د پلي کولو لپاره د چوکاټ په اړه یوې اضافي تفاهم ته رسېدلي دي.

دغه تفاهم "د دې په اړه دی چې څنګه موږ کولی شو د نادره معدني موادو انتقالات امریکا ته بیا چټک کړو"

بلومبرګ د امریکا د سوداګرۍ وزیر هاوارډ لوټنیک په حواله ویلي: "هغوی به موږ ته نادره معدني مواد انتقالوي" او کله چې هغوی دا وکړي "موږ به خپلې متقابلې اقدامات ختم کړو."

ټرمپ د جمهوري غوښتونکو د مالیاتو او لګښتونو د کمولو قانون ته وده ورکولو په ترڅ کې وویل چې "یو لوی ښکلی قانون" د امریکا په تاریخ کې "یو له تر ټولو مهمو قوانینو څخه دی."

هغه زیاته کړه چې دغه قانون به "زموږ سرحدونه خوندي کړي، زموږ اقتصاد ته وده ورکړي او د امریکایي خوب بیا راژوندی کړي."

وروسته له هغې چې د استازو جرګې دغه پراخ قانون تېر میاشت په سختۍ سره تصویب کړ، د سنا جمهوري غوښتونکي اوس هڅه کوي چې دا قانون د بدلونونو سره تصویب کړي او بیا یې د تایید لپاره بېرته استازو جرګې ته واستوي.