امریکا د فدرالي استیناف محکمې د ترمپ ادارې لخوا په هیواد کې د میشتو د زرګونو تنو افغان وګړو لپاره د لنډمهاله خوندي حالت د پایته رسولو مخه ونیوله.
د امریکا د فدرالي استیناف محکمې څلورم ریاست په امریکا کې د میشتو په زرګونو تنو افغانانو د موقتي خوندیتوب د حالت د پایته رسولو اړوند د هغه حکم چې په پام کې وه د جولای په ۱۵ مه نيټه نافذ شي د سمدستي درولو پریکړه وکړه.
محکمې دا پریکړه د کډوالۍ د ملاتړ ډلې CASA د غوښتنې څخه وروسته چې د کورني امنیت وزارت لخوا د افغانانو او کامرونیانو دواړو لپاره د موقتي خوندیتوب حالت د ختمولو اقدام کړی وو وکړه.
د محکمې په پریکړه کې راغلي دي چې د کورني امنیت د وزارت د حکم د ځنډولو په اړه ددوې پریکړه به د جولای تر ۲۱ مې نیټې پورې نافذه وي. همداشان د امریکا حکومت ته د چهارشنبې د شپې تر ۱۱:۵۹ بجو پورې پدې اړه د وضاحت او ځواب ورکولو وخت ورکړ شوی دی.
د کډوالۍ د ملاتړ ډلې CASA وروسته له هغه چې د ترمپ ادارې د اپریل په میاشت کې اعلان وکړ چې د افغانستان او کامرون د اتباعو لپاره به د موقتي خوندیتوب حالت ختم کړي، ځکه چې د دواړو هیوادونو شرایط ښه شوي او دیته اړتیا نشته چې دا پروګرام دوام وکړي اقامه د دعوا وکړه.
د کامرون د وګړو لپاره خوندي حالت د اګست په ۴ مه نیټه د ختمولو نیټه ټاکل شوې وه.
د اپریل په میاشت کې، د امریکا د کورني امنیت وزارت وویل چې خراب شرایط دومره ښه شوي چې د دواړو هیوادونو وګړو لپاره د موقتي خوندیتوب حالت ته نوره اړتیا نشته.
د موقتي خوندیتوب حالت هغه بهرنیو وګړو ته چې ددوې تر حمایت لاندې وي اجازه ورکوي چې په خپلو اصلي هیوادونو کې د جګړې، طبیعي ناورینونو، یا نورو غیر معمولي شرایطو له امله په امریکا کې په قانوني ډول ژوند او کار وکړي.
د ویلو ده چې په ۲۰۲۱ کال په افغانستان کې طالبان واک ته د رسیدو نه وروسته له ۸۲،۰۰۰ څخه ډیر افغانان امریکا ته انتقال کړی شول.
له دوی له جمع څخه، له ۷۰،۰۰۰ څخه ډیرو د لنډمهاله خوندیتوب حالت په چوکاټ کې امریکا ته انتقال شول. د ویلو ده چې دا پروګرام دې کډوالو ته د دوو کلونو پورې په قانوني توګه پدې هیواد کې د اوسیدو اوسیدو اجازه ورکوله.
