تهران وايي چې د هر ډول ګواښ د ځوابولو حق لري؛ دا خبرداری وروسته له هغه ورکول کیږي چې ایران اسرائیل تورن کړل چې دغه هیواد ته د نږدې کېدو لپاره د ګاونډیو هیوادونو له فضا څخه کار اخلي، که څه هم تهران د کوم ځانګړي هیواد نوم نه دی اخیستی.

د ایران لوړپوړې ګډې پوځي قوماندانۍ د جمعې په ورځ د اسرائیلو پوځي الوتکې تورنې کړې چې ایران ته د نږدې کېدو لپاره د ګاونډیو هیوادونو له هوايي حریم (فضا) څخه کار اخلي.

د "خاتم الانبیاء" مرکزي قرارګاه په یوه اعلامیه کې، چې د ایران دولتي ټلوېزیون (IRIB) خپره کړې، ویلي چې د ایران په لور د ځینو ګاونډیو هیوادونو په فضا کې د "صهیونیستي رژیم د ترهګر پوځ" حرکت او شتون یو خطرناک عمل او د هیواد امنیت ته یو ګواښ دی.

په دغه اعلامیه کې بیا هم د کوم ځانګړي ګاونډي هیواد یا هیوادونو نوم نه دی اخیستل شوی.

یادې قرارګاه خبرداری ورکړی چې که متحده ایالات ونشي کولی اسرائیل مهار یا کنټرول کړي، ایران به "د خپل ځان پر وړاندې هیڅ ډول ګواښ ونه زغمي."

اعلامیې زیاته کړې چې تهران د دا ډول "خطرناکو" اقداماتو د ځواب ورکولو حق د ځان لپاره خوندي ساتي.