د ایران سپاه پاسداران ادعا کوي چې د امریکا د توغندیو توغونکي یې په ډرون عملیاتو کې ویجاړ کړي، خو سېنټکام دا ادعا ردوي او وايي چې امریکايي سرتېرو ته مرګژوبله نه ده اوښتې.
د ایران سپاه پاسداران انقلابي ځواک ویلي چې په کویټ کې یې د امریکا د هایمارس (HIMARS) توغندیو سیستم له منځه وړي دي؛ دا په داسې حال کې ده چې په ټوله سیمه کې کړکېچ په بې ساري ډول په ډېرېدو دی.
د فارس نیمه دولتي خبري اژانس لخوا خپره شوې اعلامیه کې، سپاه پاسداران ویلي چې دوی د امریکا مځکې نه مځکې ته د توغندیو سیستم په یو "دقیق ډرون عملیاتو" کې په نښه کړي دي. په اعلامیه کې راغلي چې دغه توغندي او ورسره تړلي د توغندیو صندوقونه (pods) چې "ایران ته د برید لپاره چمتو وو، له منځه وړل شوي دي."
سپاه پاسداران همداراز د هغو غیر رسمي راپورونو یادونه کړې چې ادعا کوي په دې عملیاتو کې درې امریکايي افسران وژل شوي او یو شمېر نور ټپیان دي.
د دغې اعلامیې له مخې، د امریکا د لنډ واټن هایمارس توغندیو د وروستیو بریدونو او د فبرورۍ له میاشتې راهیسې د امریکا او اسرائیلو د ګډو عملیاتو پر مهال د ایران د سویلي ساحل څو سیمې په نښه کړې وې.
خو د امریکا مرکزي قومانداني (سېنټکام) پر X (ټویټر) په یوه بیان کې دا ادعا په کلکه رد کړه او ویې ویل: "ادعا: ایراني پروپاګند نن ادعا وکړه چې په کویټ کې د ایران په بریدونو کې درې امریکايي سرتېري وژل شوي دي. حقیقت: دا درواغ دي. نن په کویټ کې هیڅ یو امریکایي سرتېری نه دی وژل شوی او نه هم ټپي شوی دی."
د کویټ چارواکو تر اوسه د ایران د دې ځانګړې ادعا په اړه څه نه دي ویلي.
تر دې وړاندې، کویټ ویلي وو چې د دغه هېواد په شمال کې پر دریو ځمکنیو سرحدي پوستو او د کویټ د تېلو شرکت پر یوې سمندري برمه کولو دستګاه بریدونه شوي، چې مالي زیانونه یې اړولي او یو کارکوونکی یې ټپي کړی دی، خو دا یې نه و مشخص کړي چې دا بریدونه د چا لخوا شوي دي.
