د برازیل ولسمشر لویز اناسیو لولا دا سیلوا د امریکا د ولسمشر ډونالډ ټرمپ هغه څرګندونې «سمندري غلا» وبللې چې ویلي یې دي، د هرمز له تنګي څخه پر ټولو تېرېدونکو سوداګریزو بارونو کښتیو به ۲۰ سلنه د تېرېدو محصول اخیستل کېږي.
لولا دا سیلوا په ساو پاولو ښار کې په یوه غونډه کې د وینا پر مهال، د ډونالډ ټرمپ د هغې پرېکړې په وړاندې توند غبرګون وښود چې له مخې یې د هرمز له تنګي څخه پر تېرېدونکو بارونو مالیه لګول کېږي.
لولا دا سیلوا وویل: "د امریکا په څېر یو مهم هیواد چې د اوږدې مودې لپاره یې له سمندري غلا سره مبارزه کړې، اوس پخپله په یو سمندري غل نشي بدلېدلی. دوی حق نه لري چې له دې ځایه (هرمز تنګي) مالیه واخلي. په هرمز تنګي کې د روانو پېښو مسوولیت د امریکا پر غاړه دی."
لولا دا سیلوا دې ته په اشارې سره چې د فرورۍ په ۲۸مه پر ایران د امریکا له بریدونو وړاندې د هرمز تنګی د بېړۍ چلولو پر مخ خلاص و، ادعا وکړه چې د ټرمپ اداره غواړي "ناورینونه په فرصت بدل کړي او له هغې څخه مالي ګټه ترلاسه کړي."
د برازیل ولسمشر زیاته کړه چې په منځني ختیځ کې روانه جګړه د نړۍ اقتصاد ته "جدي" زیان رسوي: "د جګړې بیه د خلکو پر دسترخوان اغېز کوي. کله چې د تیلو بیې لوړې شي، ورسره د لوبیا، وریژو، رومي بانجانو او پیازو بیې هم لوړېږي."
بلخوا، د امریکا ولسمشر ډونالډ ټرمپ اعلان کړی و چې په هرمز تنګي کې د ایران پر وړاندې د امریکا سمندري کلابندي (بندیز) بیا پیل شوې او له دغه تنګي څخه پر ټولو تېرېدونکو بارونو به ۲۰ سلنه محصول اخیستل کېږي.
ټرمپ په سیمه کې د امنیت ساتلو لګښتونو ته په اشارې سره ویلي وو: "د نړۍ په دې خورا بې ثباته سیمه کې د امنیت او خوندیتوب د ټینګښت لپاره د ټولو اړینو لګښتونو د پوره کولو په موخه، له تنګي څخه پر ټولو تېرېدونکو بارونو به ۲۰ سلنه محصول واخیستل شي."
