د هالنډ په اتریخت ښار کې د پولیسو لخوا پر دوو مسلمانو ښځو له برید وروسته لاریونونه پیل شول.

لاریون کوونکو "سیسټماټیک" نژاد پرست تاوتریخوالی وغانده او د اړوند افسر د دندې ځنډولو، بښنې غوښتلو او حساب ورکولو غوښتنه یې وکړه.

په سلګونو لاریون کوونکي د پنجشنبې په ورځ د هالنډ په اتریخت ښار کې راټول شول ترڅو هغه څه وغندي چې دوی یې د پولیسو نژاد پرست تاوتریخوالی بولي. دا لاریون وروسته له هغه وشو چې یوه ویډیو خپره شوه چې پکې یو پولیس افسر د یوې بوختې سوداګریزې ټولګې (مال) مخې ته پر دوو مسلمانو ښځو برید کوي.

دا لاریون چې په "فریډنبرګ" (Vredenburg) چوک کې ترسره شو، د هغې پېښې په غبرګون کې و چې د دوشنبې په ورځ د "هوګ کاتارین" سوداګریز مرکز ته نږدې شوې وه. په ویډیو کې لیدل کیږي چې یو پولیس افسر یوه ښځه په ډنډه وهي او بلې ښځې ته په نس کې لغته ورکوي. دغه ویډیو چې په ټولنیزو رسنیو کې په پراخه کچه خپره شوې، په ټول هالنډ کې یې غوسه راپارولې ده.

لاریون کوونکو وویل چې دا برید کومه ځانګړې پېښه نه ده، بلکې د تبعیض او له حده زیات ځواک کارولو د یوې پراخې لړۍ برخه ده. هغوی وویل: "نژاد پرست تاوتریخوالی په سیسټماټیک او تکراري ډول پیښیږي،" او د پولیسو په جوړښت کې یې د اصلاحاتو غوښتنه وکړه.

"فاشیست پولیس، ترور بند کړئ"

لاریون کوونکو له هالنډي پولیسو وغوښتل چې له قربانیانو څخه په عامه توګه بښنه وغواړي، اړوند افسر له دندې وځنډوي او تضمین ورکړي چې دا ډول پېښې به بیا نه تکراریږي. هغوی د "عدالت نشته، سوله نشته"، "نژاد پرستو پولیسو ته نه" او "فاشیست پولیس، ترور بند کړئ" شعارونه ورکول او وروسته د "پاردین ویلډ" (Paardenveld) د پولیسو مرکز په لور لاړل.

هالنډي پولیسو تایید کړه چې د پېښې په اړه یې پلټنې پیل کړې دي او ټولې ویډیوګانې به وڅېړل شي. پولیسو په یوې اعلامیه کې زیاته کړې چې یوه ښځه د یو افسر ته د سپکاوي په تور نیول شوې وه. د پولیسو یوه ویاند ومنله چې دې انځورونو "قوي احساسات او ډېرې پوښتنې" راپارولې دي، په ځانګړې توګه د نژاد پرستۍ په اړه.

د دغو ښځو وکیل، انیس بومنجل، وویل چې افسر د پېښې پر مهال څو نژاد پرستې خبرې کړې وې، په شمول د دې چې یوې ښځې ته یې ویلي وو: "تاسو په دې هېواد پورې اړه نه لرئ." بومنجل وویل چې دواړه ښځې ټپيانې شوې دي او دا مهال تر درملنې لاندې دي. دې قضیې په هالنډ کې د پولیسو د کړنو په اړه څارنه زیاته کړې او یو ځل بیا یې د نژاد پرستۍ او حساب ورکولو په اړه بحثونه تاوده کړي دي.