ټرمپ وایي هیله لري چې روسیه او اوکراین به په دې اونۍ کې د جګړې پای ته رسولو یو تړون لاسلیک کړي
د امریکا ولسمشر ډونلډ ټرمپ ویلي چې هیله لري اوکراین او روسیه د روانې اوونۍ په دننه کې د جګړې د پای ته رسولو لپاره یوې موافقې ته ورسیږي.
ټرمپ د یکشنبې په ورځ په خپل شخصي ټولنیز مډیا پلاټفورم ټروت سوشیل له لارې په خپور کړي بیان کې وویل: "هیله ده چې روسیه او اوکراین پدې اوونۍ کې یوه موافقه وکړي."
هغه زیاته کړه: " دواړه هېوادونه به د امریکا سره چې د ډیر بریالیتوب سره پرمختګ کوي لوی کاروبار پیل کړي او ډېرې ګټې به ترلاسه کړي!"
د ټرمپ دغه څرګندونې وروسته له هغې وشوې چې د اوکراین ولسمشر ولادیمیر زیلینسکي وړاندیز وکړ چې د ملکي زیربناوو پر وړاندې بریدونه دې د ۳۰ ورځو لپاره ودرول شي.
زیلینسکي د ایکس له لارې په خپور کړي بیان کې وویل "اوکراین وړاندیز کوي چې د اوږد واټن ډرونونو او توغندیو په وسیله د ملکي زیربناوو پر وړاندې بریدونه دې لږ تر لږه د ۳۰ ورځو لپاره ودرول شي، او دا موده د اړتیا په صورت کې غځېدلی شي."
هغه زیاته کړه که روسیه دا وړاندیز رد کړي، نو دا به ثابته کړي چې دوی غواړي جګړه اوږده کړي.
د کرملین چارواکو مخکې ویلي وو چې د روسیې ولسمشر ولادیمیر پوتین د ایسټر اوربند د غځولو امر نه دی کړی.
د شنبې په ورځ، پوتین په اوکراین کې د روانې جګړې لپاره د ۳۰ ساعته یو اړخیز اوربند اعلان وکړ، او ویې ویل چې د دې بریا یا ناکامي به د کیف د سولې د حل لپاره د چمتووالي څرګندونه وکړي.
په ځواب کې، زیلینسکي وویل چې هېواد به د روسیې اقداماتو ته ورته عمل وکړي، او زیاته یې کړه چې کیف وړاندیز کوي د اوربند موده دې وغځول شي "که چېرې بشپړ اوربند په رښتیا عملي شي."
خو وروسته هغه ادعا وکړه چې د روسیې د سرحدي سیمو کورسک او بیلګورود کې جګړه روانه وه.
د ټرمپ د جنورۍ میاشتې د لوړې مراسمو راهیسې، امریکا د جګړې د پای ته رسولو لپاره په ډیپلوماتیکو هڅو کې فعاله برخه اخیستې، او د اوکراین او روسیې سره یې خبرې پیل کړې دي.