د امریکا په میشیګان ایالت کې  په کلیسا کې د ډزو له امله د وژل شویو شمېر څلورو ته لوړ شو

یوه ناپېژانده وسله‌وال د ګرانډ بلانک ښارګوټي کې " د عیسي مسیح پر کلیسا" ډزې کړې دي. پولیسو تایید کړې چې دغه بریدګر "ګڼ شمېر کسانو" ته مرګ ژوبله اړولې او په خپله هم په ډزو وژل شوی دی.

د امریکا په شمالي ایالت میشیګان کې پولیسو ویلي، له هغې مورمون کلیسا څخه دوه نور جسدونه هم راایستل شوي، چې یوه وسله‌وال پرې برید کړی و او اور یې ورته اچولی و. په دې سره د وژل شویو کسانو ټولیز شمېر څلورو ته ورسېد.

د ګرانډ بلانک د پولیسو مشر ویلیم ریني یوې خبري غونډې ته وویل چې د سوځېدلې کلیسا په کنډوالو کې د روانو پلټنو پرمهال "یو څو نور جسدونه" موندل شوي دي.

هغه وویل: "نو په دې سره زموږ د قربانیانو ټولیز شمېر څلورو ته لوړیږي."

دا پېښه د ډیټرویټ ښار شمال ته په شاوخوا ۸۰ کیلومترۍ کې د وروستیو ورځو د عیسي مسیح په کلیسا کې رامنځته شوه.

چارواکو وویل چې ودانۍ کې اور هم لګېدلی و، خو دا سمدلاسه روښانه نه وه چې ایا دا اورلګېدنه له ډزو سره تړاو لري که نه.

پولیسو تایید کړه چې خلکو ته نور ګواښ نشته، خو د قربانیانو د شمېر او د هغوی د وضعیت په اړه یې جزئیات ورنکړل.

بېړنۍ مرستندویه ډلې سیمې ته رسېدلې دي او پلټنې روانې دي.

'د تاوتریخوالي وبا'

"د وروستیو ورځو د عیسي مسیح کلیسا"، چې مشر یې یوه شپه وړاندې د ۱۰۱ کلونو په عمر مړ شوی و، د یکشنبې برید "د تاوتریخوالي یوه غمجنه پېښه" وبلله.

دغې کلیسا په ایکس (پخواني ټویټر) کې ولیکل: "عبادت ځایونه باید د سولې، دعا او اړیکو لپاره پناه ځایونه وي. موږ د ټولو قربانیانو لپاره د سولې او روغتیا دعا کوو."

د مورمون کلیسا چې په ۱۸۳۰ کال کې تاسیس شوې، ځان یوه عیسوي ډله ګڼي، خو عقاید یې د "مورمون کتاب" پر بنسټ دي، یو متن چې پلویان یې وایي د انجیل په پرتله د عیسی مسیح د خبرو بشپړه بڼه لري.

د دغو بریدونو په پایله کې سیاسي اختلافات نور هم ژور شوي، او ټرمپ د کیڼ اړخو ډلو پر وړاندې یو کمپاین پیل کړی، کومې چې هغه "کورني ترهګر" بولي.

د امریکا ولسمشر ډونالډ ټرمپ د یکشنبې په ورځ په خپله "ټروت سوشل" پاڼه ولیکل: "زموږ په هېواد کې د تاوتریخوالي دا وبا باید سمدستي پای ته ورسېږي!"